ମାସରେ ପାଖାପାଖି କୋଡ଼ିଏ ବାଇଶି ଦିନ ତାଲା ଲାଗି ରହୁଥିବା, ସହର ଶେଷ ମୁଣ୍ଡରେ ଥିବା ଏଇ ଘରଟି କାହିଁକି କେଜାଣି କାହାରି ଆଖିକୁ ଭଲ ଦେଖା ଯାଏନି । କିଏ ଏ ଧୂଳି ଧୂସରିତ ରଙ୍ଗହୀନ ଘରଟିକୁ ପସନ୍ଦ କରେନି ତ’ ଆଉ କେହି ସେ ଘରେ ସାମାଜିକ ଚଳଣିଠାରୁ ଦୂରେଇ ରହୁଥିବା ଲୋକଟିକୁ । ଅନେକ ତ’ ସେ ପରିତ୍ୟକ୍ତ ପ୍ରାୟ ଘରେ ରହୁଥିବା ଲୋକଟିକୁ ଚିହ୍ନିନାହାନ୍ତି । ଏଇ ଘରଟି ଯେମିତି ସମୀର ଅପେକ୍ଷାରେ ହିଁ ସମୟ କାଟେ ! ଘର ପାଚେରୀରେ ଅନେକ ପୋଷ୍ଟର ଓ ବିଜ୍ଞାପନର ସମ୍ଭାର । ଚକ୍ ସାହାଯ୍ୟରେ ପାଚେରୀରେ କିଏ ଗୋଟେ ବଡ଼ ବଡ଼ ଅକ୍ଷରରେ ଗାରେଇ ଦେଇଛି ‘ବାୟା ଡାକ୍ତର’ ! ସେ ସବୁକୁ ଦେଖି ବି ଅଣଦେଖା କରେ ସେଇ ଘରେ ରହୁଥିବା ସେ ବାୟା ଡାକ୍ତର ‘ସମୀର’ ! ଯଦିଓ ଏ ସମାଜ ଦିନେ ତା’ ହୃଦୟର ଭାଷାକୁ ବୁଝିନଥିଲା, ପଡ଼ୋଶୀ ସହରରେ ଡାକ୍ତର ଥିବା ସମୀର କିନ୍ତୁ ହୃଦୟର ଭାଷା ଭଲଭାବେ ବୁଝିପାରେ । ଜଣେ ଦକ୍ଷ କାର୍ଡିଓଲୋଜିଷ୍ଟ ଭାବେ ଅନେକ ଖ୍ୟାତି ଅର୍ଜନ କରିଥିବା ସମୀରକୁ ଏ ସହରର ଅନେକ ଲୋକ କିନ୍ତୁ ଠିକ୍ଭାବେ ଜାଣି ନାହାନ୍ତି ଆଉ ସମୀର ବି ଏଠି ନିଜ ପରିଚୟକୁ ଯଥାସମ୍ଭବ ଲୁଚେଇବାକୁ ଚେଷ୍ଟା କରିଛି ।
ଚାକିରୀ ପାଇବା ପରେ ପରେ ଗୋଟିଏ ଦୁର୍ଘଟଣାରେ ବାପାମାଆଙ୍କୁ ହରେଇଥିଲା ସମୀର । ଏକପ୍ରକାର ନିଶ୍ୱ ଆଉ ସମ୍ପୂର୍ଣ୍ଣ ଏକା ହେଇ ଯାଇଥିଲା । ଦିଗହରା ସମୀର ଜୀବନରେ ‘ସୋନଲ’ ଆସିଥିଲା ଫଗୁଣର ଫଗୁ ସାଜି । ସୋନଲ ଥିଲା ଫରେଷ୍ଟ ଅଫିସର ଶୁକ୍ଳା ସାହେବଙ୍କ ଝିଅ । ଗୋଟେ ପ୍ରୋଜେକ୍ଟକୁ ନେଇ ଦୁହିଁଙ୍କର ଦେଖାହୁଏ ଆଉ ସମୀର ନିଜ ପେଶା ଓ ଅଭିଜ୍ଞତା ବିଷୟରେ କହୁକହୁ ମନଖୋଲି ସବୁ କହିଦିଏ ସୋନଲ ପାଖରେ । ସୋନଲ ମନର ଦୁଃଖ ଓ ସମ୍ବେଦନା ହଠାତ ପ୍ରେମର ରୂପ ନିଏ, ସେ ଭଲ ପାଇବସେ ସମୀରକୁ । କେବେ କାହା ପାଇଁ ଖୋଲି ନଥିବା ହୃଦୟ ଦୁଆରକୁ ପ୍ରଥମଥର ସମୀର ବି ଖୋଲିଦିଏ ସୋନଲ ପାଇଁ । ଭାଷାର ଭିନ୍ନତା ସତ୍ତ୍ୱେ ପରସ୍ପରକୁ ଭଲଭାବେ ବୁଝି ପାରୁଥିବା ଦୁଇଟି ମନ, ପ୍ରେମ ଆକାଶରେ ବହୁଦୂରକୁ ଉଡ଼ି ଯାଇଥିଲେ । ପରସ୍ପରଠାରୁ ଅଲଗା ନ ହେବାର ପ୍ରତିଶ୍ରୁତି ଦୁହିଁଙ୍କ ଶରୀର ଓ ଆତ୍ମାକୁ ଏକ କରିଦେଇଥିଲା । ଶୁକ୍ଳା ସାହେବଙ୍କର ମିଛ ଅହଙ୍କାର ଆଉ ଜାତି ଅଜାତିର ଖେଳରେ କିନ୍ତୁ ଛୋଟ ପଡ଼ିଗଲା ସମୀରର ବ୍ୟକ୍ତିତ୍ୱ । ସେ ଜିଦ୍ ଧରିବସିଲେ, କୌଣସି ସର୍ତ୍ତରେ ବି ସୋନଲର ବିବାହ ନିଜ ଜାତି ଓ ଭାଷା ବାହାରେ କରେଇ ଦେବେନି । ସୋନଲ ସହିପାରିଲାନି ସମୀରଠାରୁ ଦୂରତ୍ୱ ଆଉ ନିଜ ପ୍ରେମକୁ ଏ ଦୁନିଆରେ ଛାଡ଼ି ଚାଲିଗଲା ଆରପାରିକୁ । ଘର ବିକିବାକୁ ବିଜ୍ଞାପନ ଦେଇ ଶୁକ୍ଳା ସାହେବ ସେ ଘର ଛାଡ଼ି ଚାଲିଗଲେ, ଯୋଉଠି ସୋନଲ ନିଜ ଜୀବନକୁ ଶେଷ କରିଥିଲା । ସମୀର ଜଣେ ବ୍ରୋକରକୁ ହାତ କରି କିଣିଥିଲା ସେ ଘର । ସୋନଲର ସ୍ମୃତି କେବେ ତା’ ମନରୁ ଲିଭିଯାଉ ବୋଲି ସେ ଚାହୁଁ ନଥିଲା । ସୋନଲ ଯିବାପରେ ଏକୁଟିଆ ତିନିଟା ବସନ୍ତ କାଟିଲାଣି ସମୀର ଆଉ ପ୍ରତିଦିନ ଅନେକ ହୃଦୟ ତନ୍ତ୍ରୀକୁ ସଜାଡ଼ି ଚାଲିଥିବା ସମୀର କିନ୍ତୁ କାହାକୁ ନିଜ ହୃଦୟର ଠିକଣା ଦେଇନି । ଅନେକ ଆସିଛନ୍ତି, ଖୋଜିବାକୁ ଚେଷ୍ଟା ବି କରିଛନ୍ତି, ହେଲେ ସତେ ଯେମିତି ସମୀର ନିଜେ ହିଁ ହରେଇ ବସିଛି ସେ ଠିକଣାର ରାସ୍ତା ।
ଥରେ ରାତି ଦୁଇଟା ବେଳେ କୌଣସି ଏକ ସ୍ତ୍ରୀ ସ୍ୱରରେ ସମୀରର ନିଦ ଭାଙ୍ଗିଗଲା । ତଟସ୍ଥ ହେଲା ଉତ୍ତାରୁ ଜାଣିଲା ଯେ ଜଣେ ଯୁବତୀ ବାହାରେ ଛିଡ଼ାହୋଇ ସାହାଯ୍ୟ ଭିକ୍ଷା କରୁଛି । ଡାକ୍ତର ଧର୍ମାନୁସାରେ ସମୀର କାଳବିଲମ୍ବ ନକରି ଘର ବାହାରେ ଛିଡ଼ା ହେଇଥିବା ଗାଡ଼ି ପାଖକୁ ଯାଇ ଦେଖେ ତ’ ଜଣେ ବୟସ୍କ ଲୋକ ମୁମୂର୍ଷ ଅବସ୍ଥାରେ ପଛ ସିଟରେ ଶୋଇଛନ୍ତି । ସମୀର ପଚାରିଲା, “ଇଏ କିଏ, କ’ଣ ହେଇଛି ୟାଙ୍କର?” ଝିଅ ଜଣକ ଉତ୍ତର ଦେଲା, “ଇଏ ମୋ ବାପା ଆକାଶ ଦାଶ । ହଠାତ ଛାତିରେ ଅସହ୍ୟ ଯନ୍ତ୍ରଣା ଅନୁଭବ କଲେ, ତାଙ୍କୁ ନେଇ ହସ୍ପାତାଳ ଯିବା ରାସ୍ତାରେ ଗାଡ଼ିଟା ଧୋକାଦେଲା । ସାର୍ ପ୍ଲିଜ଼୍ ଆପଣ ମୋତେ ସାହାଯ୍ୟ କରନ୍ତୁ ।” ସମୀର ଧାଇଁଗଲା ଘର ଭିତରକୁ, ଷ୍ଟେଥୋ ନେଇ ଫେରିଲା ବେଳକୁ ଝିଅଟି ଜାଣିଲା ସମୀର ଜଣେ ଡାକ୍ତର । ସ୍ୱଳ୍ପ ଉପଚାର ପରେ ଆକାଶ ସୁସ୍ଥପ୍ରାୟ ହେଲେ, ଉଠି ବସିଲେ । ଗାଡି ଖରାପ ଥିଲା ଆଉ ସମୀର ସକାଳ ପର୍ଯ୍ୟନ୍ତ ଦୁହିଁଙ୍କୁ ନିଜଘରେ ରହିବାକୁ ଅନୁରୋଧ କଲା । ପରଦିନ ସକାଳୁ ବିଦାୟ ଦେଲାବେଳେ ନିଜ ହସ୍ପାତାଳର ଠିକଣା ଦେଇ ବିଭିନ୍ନ ପରୀକ୍ଷା ସବୁ କରେଇ ନେବାକୁ ପରାମର୍ଶ ଦେଲା ।
ସୋନାଲି ଦାଶ, ଆକାଶ ବାବୁଙ୍କର ଏକମାତ୍ର ପୁତ୍ରୀ, ଯିଏ ପେସାରେ ଜଣେ ବ୍ୟାଙ୍କର । ଉଚିତ ସମୟରେ, ସମୀର ହସ୍ପାତାଳରେ ଆକାଶ ବାବୁଙ୍କ ଚିକିତ୍ସା ଆରମ୍ଭ କରିଥିଲା । ହାର୍ଟଷ୍ଟେଣ୍ଟ ଲାଗିଲା ପରେ ଆକାଶ ବାବୁ ଏକପ୍ରକାର ନିରାମୟ ହେଲେ ଆଉ ସମୀର ବିଷୟରେ ଜାଣିବାର ଉତ୍କଣ୍ଠା ସୋନାଲି ମନରେ ବଢ଼ି ଚାଲିଲା । ଏଇ ଘଟଣାର ଠିକ୍ ସପ୍ତାହେ ପରେ ସମୀର ସହ ହଠାତ ଦିନେ ସୋନାଲିର ଦେଖା ହେଲା । ସୋନାଲିର କଫି ନିମନ୍ତ୍ରଣକୁ ଅଣଦେଖା କରି ପାରିଲାନି ସମୀର । ବହୁତ ଦିନପରେ, ଅଳ୍ପସମୟ ମଧ୍ୟରେ ଗୋଟେ ବନ୍ଧୁତ୍ୱର ପରିବେଶ ସୃଷ୍ଟି ହେଲା ସମୀର ଓ ସୋନାଲି ମଧ୍ୟରେ । ସମୀରର ନିସଙ୍ଗ ଜୀବନରେ ଗୋଟେ ନୂଆ ରଙ୍ଗ ଲାଗି ଯାଇଥିଲା ଯେମିତି । ଆଉ ଏକ ଫଗୁଣ ଆଉ ଜଣେ ବନ୍ଧୁକୁ ନେଇ ଆସିଥିଲା ତା’ ଜୀବନ ପରିଧିକୁ । ହେଲେ ପ୍ରେମର ଦଂଶନଜ୍ୱାଳା ଏବେବି ମନରୁ ଲିଭି ନଥିଲା । ପ୍ରେମକୁ ନିଜ ହୃଦୟରେ ସ୍ଥାନ ଦେବାପାଇଁ ହୃଦୟ ବିଶାରଦ ସମୀର ପଛଘୁଞ୍ଚା ଦେଇ ଚାଲିଥିଲା । ଆଉ ସେପଟେ ସୋନାଲି ନିଜ ମନରେ ବୁଣି ଚାଲିଥିଲା ଅସରନ୍ତି ସ୍ୱପ୍ନର ବୁଢ଼ିଆଣି ଜାଲ । ସମୟ ସ୍ରୋତରେ ଅସହାୟ ଓ ସବୁ ଆତ୍ମୀୟଙ୍କୁ ହରେଇଥିବା ସମୀରକୁ ନିଜର କରିବାକୁ ପଣ କରିଥିଲା ସିଏ । ସେଦିନ ରାତିରେ ସୋନାଲି ଯେ ସମୀରର ଜୀବନୀ ଡାଏରି ପଢ଼ି ଦେଇଥିଲା, ସେକଥା ସମୀର ହୁଏତ ଜାଣି ନଥିଲା !
ଏହାର ଦ୍ଵିତୀୟ ଭାଗ “ଫେରିଛି ବର୍ଷା” ପ୍ରକାଶ ପାଇଥିଲା ଆମର ତୃତୀୟ ସଂସ୍କରଣରେ…
– ପ୍ରବୀର କୁମାର ସାହୁ
Comments
ପ୍ରବୀର କୁମାର ସାହୁ
ପ୍ରବୀର କୁମାର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
