ଜୟ ଶିବ ଶଙ୍କର ହେ ଜୟ ଉମାପତି
ତୁମ ପାଦ ସ୍ମରଣରେ ଯାଉ ଦିନବିତି ।
ଜୟ ଜଟାଧାରି ପ୍ରଭୁ ଜଗତ ତାରଣ
ଭକତ ଜନଙ୍କ ଦୁଃଖ ନିବାର ବହନ ।
ଜୟ ମହାଦେବ ନାଥ ଅନଳ ନୟନ
ଶ୍ମଶାନ ବିହାରି ଶିବଶମ୍ଭୁ ତ୍ରିଲୋଚନ ।
ଜୟ ଭୁତନାଥ ଦେବ ଅନଳ ନୟନ
ଏ ସାରା ବିଶ୍ଵକୁ ପ୍ରଭୁ କରିଛ ନିର୍ମାଣ ।
ଜୟ ପଞ୍ଚାନନ ନାଥ ଜୟ ଦିଗାମ୍ବର
ପରମ ପୂରୁଷ ଅଟ ଯୋଗି ଯୋଗେଶ୍ୱର ।
ତ୍ରିପୁରାରି ଶୂଳଧାରି ମହିମା ଅପାର
ସବୁ ଯୁଗେ ଅଧର୍ମକୁ କରହେ ସଂହାର ।
ଆଦିଙ୍କ ପୂଜିତ ଭୋଳାନାଥ କୃତିବାସ
ଶ୍ରୀଚନ୍ଦ୍ରଶେଖର ପ୍ରଭୁ ଭକତ ବିଶ୍ଵାସ ।
ପୀନାକ ଧାରଣ ନାଥ ଖଣ୍ଡ ପର୍ଶୁଧର
ଜୟ ଦେବ ମହାଦେବ ପ୍ରଭୁ ମହେଶ୍ଵର ।
ଦେବତାଙ୍କ ହିତେ ପ୍ରଭୁ ବିଷ ପାନକଲ
ଏସାରା ବ୍ରହ୍ମାଣ୍ଡେ ନୀଳକଣ୍ଠ ବୋଲାଇଲ ।
ଧୂର୍ଜ୍ୱଟି ଗିରିଶ ଦେବ ପାପ ତାପ ହାରି
ବିଶାଳ ଜଗତ ପ୍ରଭୁ ରଖିଛ ଉଦ୍ଧାରି ।
ଏକ ମାତ୍ର ତୁମ୍ଭ ପାଦପଦ୍ମେ ଆଶ୍ରା ମୋର
ଭରସା କରିଛି ଦେବ ମୋର ଦୁଃଖ ହର ।
ତ୍ରାହିକର ଉମାସାଇଁ ଏ ଭବ ସାଗରୁ
ମୋ ଆରତ ଫେଡ ନାଥ ଏ ମିଛ ସଂସାରୁ ।
– ମମତା ସାହୁ
Comments
ମମତା ସାହୁ
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
