ବ୍ୟସ୍ତ ବିବ୍ରତ ଦୁନିଆରେ
ଜୀବନର ଛକାପଞ୍ଝା ଖେଳରେ
କେବେ ପରାସ୍ତ ହେଇଗଲେ
ଟିକିଏ ହସିଦେଇ
କହିଦେ ମୁଁ ହାରିବିନି ।
ପ୍ରତିଯୋଗିତା ପୂର୍ଣ୍ଣ ସମାଜରେ
ତୁ ପଛେଇ ଗଲେ
ଭୟ କରନି
ଟିକିଏ ରହିଯା
ଟିକିଏ ହସିଦେଇ
କହିଦେ ମୁଁ ହାରିବିନି ।
ସପନ ପଥେ ଚାଲୁ ଚାଲୁ
ଗୋଡ଼ ଖସିଗଲେ
ଭାଙ୍ଗି ପଡ଼ନି
ଟିକିଏ ରହିଯା
ଟିକିଏ ହସିଦେଇ
କହିଦେ ମୁଁ ହାରିବିନି ।
ଅନ୍ଧାରରେ ତୋ’ ରଙ୍ଗ ଲୁଚିଗଲେ
ବ୍ୟସ୍ତ ହୁଅନି
ଟିକିଏ ଅପେକ୍ଷା କର
ଅନ୍ଧାର ଅପସରି ଗଲାପରେ
ନୀଳ ଆକାଶରେ
ପ୍ରଭାକର ଉଠିବ
ତୋ’ ରଙ୍ଗ ଇନ୍ଦ୍ରଧନୁ ପରି ଶୋଭା ପାଇବ
ସେଥିପାଇଁ ଟିକିଏ ହସିଦେଇ
କହିଦେ ମୁଁ ହାରିବିନି ।
ଅନ୍ୟର କୁକର୍ମ ଯଦି
ତୋ’ ହୃଦୟକୁ ମର୍ମାହତ କରେ
କ୍ରୋଧର ଜ୍ୱାଳାରେ
ନିଜକୁ ସମର୍ପି ଦେ’ନି
ତାକୁ କ୍ଷମା କର
ଟିକିଏ ହସିଦେଇ
କହିଦେ ମୁଁ ହାରିବିନି ।
ସ୍ୱାର୍ଥପର ସମାଜରେ
ହାସ୍ୟାସ୍ପଦ ହେବା ଭୟରେ
ନିଜ କର୍ମ, ଇଚ୍ଛାର ବଳିଦାନ କରନି
ବିନା ଦ୍ୱିଧାରେ ପାଦ ବଢ଼ାଇଚାଲ
ତୁ ବି ଟିକିଏ ହସିଦେଇ
କହିଦେ ମୁଁ ହାରିବିନି ।
– ସୁନିତା ପଟେଲ
Comments
ସୁନିତା ପଟେଲ
ସୁନିତା ପଟେଲ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
