କୁଆଁର ପୁନେଇ ଜହ୍ନ ଗୋ
ଫୁଲ ବଉଳ ବେଣୀ
ଶରତ ଆକାଶେ ଜହ୍ନ ହସୁଥାଏ
କେଡ଼େ ଶୋଭା ଦିଶେ ପୁଣି ॥
କୁଆଁରୀ ମନରେ ଅପୂର୍ବ ଆନନ୍ଦ
ପୁଚି ଖେଳିବାକୁ ମନ
ଆହୁରି ସୁନ୍ଦର ସଜାଇ ହୁଅନ୍ତି
ପିନ୍ଧନ୍ତି ନୂଆଁ ବସନ ॥
ଚନ୍ଦନ କୁଙ୍କୁମ ଅଳତା ନାଇକି
ମିଳନ୍ତି ଚଉଁରା ମୂଳେ
ଝିଅ ବୋହୂ ମିଶି ହରସ ମନରେ
ଚଉଁରାରେ ଦୀପ ଜାଳେ ॥
ଚାନ୍ଦ ପୂଜା ପାଇଁ ସଜବାଜ ହୋଇ
ଆନନ୍ଦେ ଭୋଗ ବାଢ଼ନ୍ତି
ଜହ୍ନି ଓଷା ପାଇଁ ହସୁଛି କୁଆଁରୀ
ଜହ୍ନି ଫୁଲ ଚଢ଼ାଅନ୍ତି ॥
ଭାରି ଛନ ଛନ କୁଆଁରୀଙ୍କ ମନ
ମନରେ ଆସା ଭଉଁରି
ଆକାଶରେ ଜହ୍ନ ହସେ ଖିଲି ଖିଲି
ପାଦରେ ବାଜେ ପଇଁରି ॥
ମନ ବଗିଚାକୁ କିଏ ଚୋରିକରେ
ହୁଏ ନାହିଁ ଜମା ଜାଣି
ବୟସର ବଣେ ଆସେ କିଏ ଜଣେ
ଧୀରେ ନେବ ମନ ଟାଣି ॥
– ମମତା ସାହୁ
Comments
ମମତା ସାହୁ
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
