ଲଗେଇଦେଲ ଗୋ କଳଙ୍କର ଛିଟା
ବିଶ୍ୱାସର ମଞ୍ଜି ବୁଣି
ମନ ଆକାଶରେ ଛଳନା ରଙ୍ଗର
ଇନ୍ଦ୍ରଧନୁ ଦେଲ ଟାଣି ॥
ମରୀଚିକା ସମ ଥିଲା ତୁମ ପ୍ରେମ
ମେଣ୍ଟିଲା ନାହିଁ ମୋ ତୃଷ୍ଣା
କସ୍ତୁରୀ ମୃଗ ମୁଁ ସାଜିଥିଲି ପ୍ରିୟା
ପାଇବାକୁ ତୁମ ବାସ୍ନା ॥
ଅନ୍ଧ ପ୍ରେମିକ ମୁଁ ଜାଣି ପାରିଲିନି
ମାୟାବିନୀ ତୁମେ ବୋଲି
ମାୟାରେ ତୁମର ବିଭୋର ହୋଇ ମୁଁ
ଦୁନିଆକୁ ଗଲି ଭୁଲି ॥
ବିଶ୍ୱାସଘାତକ ସାଜିଲ ଗୋ ତୁମେ
ଧରିଲ ଆଉକା’ ହାତ
ପ୍ରେମ ପାଗଳର ଆଖ୍ୟାଦେଇ ମୋତେ
ମିଛକୁ କରିଲ ସତ ॥
ଅସୀ ଧାରେ ଚାଲି କ୍ଷତାକ୍ତ ହୋଇଲି
ଝରିଗଲା ଖାଲି ଲୁହ
ଅସମ୍ପୂର୍ଣ୍ଣ ହେଲା ପ୍ରେମର କାହାଣୀ
ଛାତିରେ ଛାତିଏ କୋହ ॥
– ପ୍ରଶାନ୍ତ ପଧାନ
Comments
ପ୍ରଶାନ୍ତ କୁମାର ପ୍ରଧାନ
ପ୍ରଶାନ୍ତ କୁମାର ପ୍ରଧାନ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
