ନଇଁଲେ ମସ୍ତକ ବାରାନିଧି ପାର
ଜାଣିଛି ଦୁନିଆଁ ସାରା,
ଅବନତ କରି ପ୍ରଣାମ କରନ୍ତି
ଜ୍ଞାନୀ ଗୁଣି ସସାଗରା ।
ଜଳଧର ନମ୍ରେ ନଭ ମଣ୍ଡଳରୁ
ଜୀବନ କରନ୍ତି ଦାନ,
ପାଦପ ଉଚ୍ଚରେ ଅବସ୍ଥାନ କରି
ବିତରେ ଫଳ ପ୍ରସୂନ ।
ପ୍ରଳୟ ବତାସ ଗର୍ବ ଚୂର୍ଣ୍ଣ କରେ
ଅହଂରେ ଟେକିଲେ ମଥା
ଅଚଳା ପୃଷ୍ଠରେ ଦାରୁ ତରୁ ଯେତେ
ନଇଁ ସହିଯା’ନ୍ତି ବ୍ୟଥା ।
ନମ୍ରରେ ମିହିର ଜ୍ୟୋତି ବିଛୁରଇ
ନୟନ ଦେବତା ହୋଇ,
କଳାକର ଜ୍ୟୋତ୍ସ୍ନା ନିଶିରେ ବିଛାଡ଼ି
ତମସା ଦିଏ ହଟାଇ ।
କ୍ଷମାର ମହତ୍ତ୍ୱ ଜାଣିଛି ମହତ
ଶମିତ କରି ଗରବ,
ଶତ ଅପରାଧ କ୍ଷମି ଶିଶୁପାଳେ
ଦେଖାଇଥିଲେ ମାଧବ ।
– ଅଲେଖ ମେହେର
Comments
ଅଲେଖ ମେହେର
ଅଲେଖ ମେହେର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
