ଏଠି ଦୂରଦିଗନ୍ତ ଯାଏଁ ଶୂନ୍ୟ ମହାଶୂନ୍ୟ
ଗହୀରିର ଖାଁ ଖାଁ ପରିପାଟି
ସାଜିଛି
ଜୀବନ ମୃତ୍ୟୁର ଅଦ୍ଭୁତ ସଙ୍ଗମ
ଉଦାହରଣ ଦେଉଛି
ରାଜା ଓ ପ୍ରଜାର
ମାନ ଓ ଅଭିମାନର
ଏବଂ ଗର୍ବ ଓ ଅହଂକାରର
ଅଗ୍ନିର ଲେଲିହ ମାନରେ
ଭସ୍ମୀଭୂତ ଏମାନେ
ମୁଠାଏ ପାଉଁସରେ ପରିବର୍ତ୍ତିତ
ଏମାନଙ୍କର ସତ୍ତା…
ଚତୁର୍ଦ୍ଦିଗ ଏବେ ଧୁମ୍ରମୟ
ଧୁମାକାର ସାଜିଛି
ଏବେ ପାର୍ଥିବ ପିଣ୍ଡ
ଇଚ୍ଛା, ସ୍ୱପ୍ନ ଏବଂ କର୍ମର
ହୋଇସାରିଛି ଅନ୍ତ,
ଜଳି ଚାଲିଛି ତତ୍ତ୍ୱ
ଜଳି ଚାଲିଛି ଶରୀର
ଶିଖାଇ ଚାଲିଛି
ଜୀବନର ଅଲୌକିକ ଶୈଳୀ
ସାଜି ଯାଇଛି
ଏକ ଅମ୍ଳାନ ଆହ୍ୱାନ…
ପରସ୍ତ ପରସ୍ତ କରି
ଜଳାଇ ଚାଲିଛି ଦମ୍ଭୀର
ଅହଂକାର
ଅଭିମାନୀର ଅଭିମାନ
ମଲ୍ଲ ଯୋଦ୍ଧାକୁ ମଧ୍ୟ
ବଦଳାଇ ଦେଇ ପାରୁଛି
ମୁଠାଏ ପାଉଁସରେ,
ସମସ୍ତ ଛାତିଥରା କୋହକୁ
ଦଗ୍ଧ କରି
ନିଜ ସୀମିତ ଇଲାକାରେ…
– ପ୍ରଜ୍ଞା ପାରମିତା ପଣ୍ଡା
Comments
ପ୍ରଜ୍ଞା ପାରମିତା
ପ୍ରଜ୍ଞା ପାରମିତା ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
