କିଛି ସତ ଲୁଚି ଯାଏ ନ୍ୟାୟର ବଜାରରେ
ଅବିହିତ ଭାବେ ପ୍ରକାଶିତ ହେବା ଭୟରେ
କିଛି ସତ ଲୁଚି ରହେ ଚିରକାଳ ଲାଗି
ଲୋଚନର ଶୁଷ୍କ ନୀରବ ପତ୍ର ଆଢୁଆଳରେ
କିଛି ସତ ଲୁଚି ରହେ ଭିନ୍ନାର୍ଥବୋଧକ ଗୋଟିଏ ଶବ୍ଦରେ
ଅନେକଙ୍କୁ ବିଭ୍ରାନ୍ତ କରିବା ଆଶାରେ
କିଛି ସତ ଲୁଚି ରହେ ଭାସ୍କର କରେ
ଉନ୍ମୋଚନ ହୁଏ ଯାହା ଅମାବାସ୍ୟା ରଜନୀରେ
କିଛି ସତ ଲୁଚି ରହେ କଜ୍ଜଳ ଗାରରେ
ଯାହା ବହିଯାଏ ଲୋତକ ଧାରେ
କିଛି ସତ ଲୁଚି ଯାଏ କୋଳାହଳ କରୁଥିବା ତରଙ୍ଗିଣୀ ଧାରେ
ଯାହା ନିଶବ୍ଦ ହୋଇଯାଏ ପୟୋଧି ଗର୍ଭରେ
କିଛି ସତ ଲୁଚି ରହେ ରକ୍ତ ଜୁଡ଼ୁବୁଡ଼ୁ ହୃଦୟରେ
ମନର ଭାବକୁ ଲୁଚେଇବା ତାତ୍ପର୍ଯ୍ୟରେ
କିଛି ସତ ଲୁଚି ରହେ ଚିତ୍ରକରର ଅକୁହା ଲେଖାରେ
ଲୁଚିଯାଇ ଥାଏ ଯାହା ବହୁ ରଙ୍ଗ ସମାହାରରେ
କିଛି ସତ ଲୁଚି ରହେ ଲେଖକର କଲମ ମୁନରେ
ଯାହା ଝରିଯାଏ କାହାଣୀ ଅନ୍ତରେ
– ସୁନିତା ପଟେଲ
Comments
ସୁନିତା ପଟେଲ
ସୁନିତା ପଟେଲ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
