ଅଣସର ପିଣ୍ତି ଲୀଳା ଗଲାଣି ସରି
ଆଡ଼ପ ମଣ୍ତପକୁ ବିଜେ ହେବେ ଶ୍ରୀହରି
ଭାଇ ଭଗ୍ନୀ ଦୁହିଁଙ୍କୁ ନିଜ ସାଙ୍ଗରେ ଧରି
ନବଦିନ ପାଇଁ ଆଜି ଯିବେ ସେ ବାହାରି ॥
ଗୋପାଳ ବଲ୍ଲଭ ଖେଚୁଡ଼ିକୁ ଖାଇ ଦେଇ
ରତ୍ନ ସିଂହାସନୁ ପ୍ରଭୁ ଆସିବେ ଓହ୍ଲାଇ
ମଥାରେ ବନ୍ଧା ଫୁଲ ଟାହିଆକୁ ହଲାଇ
ପହଣ୍ତି ବିଜେ କରିବେ କଳା ଗୋସାଇଁ ॥
ନନ୍ଦିଘୋଷେ ବିରାଜିତ ହେବେ ନୀଳମଣି
ତାଳଧ୍ୱଜରେ ବସିବେ ଭାଇ ହଳପାଣି
ଭାରି ଅଲିଅଳି ପରା ସୁଭଦ୍ରା ଭଉଣୀ
ଅଟନ୍ତି ସେ ତ ଦର୍ପଦଳନର ରାଣୀ ॥
ମୁଖ୍ୟ ଆୟୁଧ ତାଙ୍କର ଚକ୍ର ସୁଦର୍ଶନ
ଦେବୀ ରଥରେ ହୁଅନ୍ତି ପରା ବିଦ୍ୟମାନ
ଚଳନ୍ତି ପ୍ରତିମା ରୂପୀ ମଦନମୋହନ
ରାମକୃଷ୍ଣଙ୍କ ସହ ରଥେ ବିରାଜମାନ ॥
ଶଙ୍କରାଚାର୍ଯ୍ୟ କରିବେ ରଥରେ ଆଳତି
ଛେରାପହଁରା ପାଇଁ ଆସିବେ ଗଜପତି
ଭକ୍ତି ପୁଷ୍ପାଞ୍ଜଳି ଦେଇ ମାଗିବେ ମିନତି
ସଂସାରର ଦୁଃଖ କ୍ଲେଶ କରିବାକୁ ଇତି ॥
ଚାରିଆଡ଼େ ଦିଶୁଥିବ ଭକତଙ୍କ ମୁଣ୍ତ
ଲୋକାରଣ୍ୟ ହୋଇଯାଇଥିବ ବଡଦାଣ୍ତ
କେତେ ସାଧୁସନ୍ଥ ଆସି ହୋଇଥିବେ ରୁଣ୍ତ
ଦାରୁବ୍ରହ୍ମ ଦର୍ଶନେ ଧନ୍ୟ କରିବେ ପିଣ୍ତ ॥
ମନ୍ତ୍ର ଗାଇ କରୁଥିବେ ନାମ ସଂକୀର୍ତ୍ତନ
ଦୁଇ ବାହୁ ମେଲି ପୁଣି ଭକ୍ତି ନିବେଦନ
ଭୁଲିଯାଇ ମୋହମାୟା ଜ୍ଞାତି ପରିଜନ
ସର୍ବେ ହୋଇଥିବେ ପରା ଭାବରେ ମଗନ ॥
ଥରେ ଦେଖିଦେଲେ ରଥରେ ବାମନ ରୂପ
ତୁଟି ଯାଇଥାଏ ଜନ୍ମଜନ୍ମାନ୍ତର ପାପ
ପୂର୍ଣ୍ଣ ହୋଇଯାଏ ଜୀବନର ସବୁ ତପ
ଦୂରିଭୁତ ହୁଏ ଯେତେ ମନର ସନ୍ତାପ ॥
ଶରଧା ବାଲିରେ ଯେବେ ରଥ ଗଡ଼ିଯିବ
ଦିବ୍ୟ ଭାବନାରେ ଆତ୍ମା ବିଭୋର ହୋଇବ
ପଞ୍ଚଭୂତର ଶରୀର ମୋକ୍ଷ ପାଇଯିବ
ସକଳ କଳୁଷ କାଳିମା ନାଶ ହୋଇବ ॥
ଛୁଆଁ ଅଛୁଆଁର ଭେଦଭାବ ଦୂର କରି
କୋଳାଗ୍ରତ କରି ନେବେ ସଭିଙ୍କୁ ଆଦରି
ଶୁଣିବାକୁ ଦୀନଦୁଃଖି ଜନଙ୍କ ଗୁହାରି
ପୁଣ୍ୟ ବଡ଼ଦାଣ୍ତରେ ବିଜେ ମୁରଲିଧାରୀ ॥
ହୃଦୟଟି ତାଙ୍କର ଦୟାର ମହୋଦଧି
ଆଶିଷ ଦିଅନ୍ତି ଢାଳି ସେ କରୁଣାନିଧି
ତାଙ୍କ କୃପାବଳେ ମିଳିଯାଏ କୋଟିନିଧି
ପାର କରି ଦେଇଥାନ୍ତି ଭବର ବାରିଧି ॥
ମର୍ତ୍ତ୍ୟ ବୈକୁଣ୍ଠରେ ଚାଲିଛି ଅପୂର୍ବ ମେଳା
ଦେବତା କରୁଛନ୍ତି ଏଠି ମାନବ ଲୀଳା
ଶୂନ୍ୟବ୍ରହ୍ମ ରୂପେ ବିରାଜି ନନ୍ଦର ବଳା
ଉଦ୍ଧାର କରି ଦିଅନ୍ତି ବୁଡିବାର ଭେଳା ॥
– ନିବେଦିତା ମହାପାତ୍ର
Comments
ନିବେଦିତା ମହାପାତ୍ର
ପୁରୀ ଜିଲ୍ଲାର ଅନ୍ତର୍ଗତ ମୁକୁନ୍ଦ ମିଶ୍ର ନଗର ନିବାସୀ ନିବେଦିତା ମାହାପାତ୍ର ମୁଖ୍ୟତଃ ଓଡ଼ିଆ ଭଜନ ଆଦି ରଚନା ଆଦିରେ ରୁଚି ରଖନ୍ତି । ଭଜନାଞ୍ଜଳୀ ସହ ସେ ଅନେକ ଗପ ଓ କବିତା ଆଦି ରଚନା କରିଛନ୍ତି ।
