ଆହେ ଗଜାନନ କରୁ ନିମନ୍ତ୍ରଣ
ମର୍ତ୍ତ୍ୟପୁରେ ଆସ ଚାଲି,
ତବ ଆଗମନେ ହସିବ ଧରଣୀ
ସବୁ ଦୁଃଖ ଯିବୁ ଭୁଲି ,
ନାନାରଙ୍ଗ ପୁଷ୍ପ ତୋଳି,
ମଣ୍ଡପ ସଜାଇ ତୁମକୁ ବସାଇ
ଜାଳିବୁ ଭକ୍ତି ଦୀପାଳି ।
ମୂଷିକ ବାହନେ ବସିଥିବ ତୁମେ
ଶୁଭୁଥିବ ଶଙ୍ଖ ଧ୍ୱନି,
ତୁମକୁ ଦେଖିଣ ଫେରିବନି ଆଖି
ବନ୍ଦନା ଗାଇବୁ ପୁଣି,
ନାନାବିଧ ଫଳ ଆଣି,
ଭକତି ଚିତ୍ତରେ କରି ସମର୍ପଣ
କରିବୁ ବିଦ୍ୟା ମାଗୁଣି ।
ତୁମେ ଅଗ୍ରପୂଜ୍ୟ ବିଘ୍ନ ବିନାଶକ
ତୁମେ ପରା ବିଦ୍ୟାଦାତା,
ତୁମ କୃପା ଲଭି ମୂର୍ଖ ବି ପଣ୍ଡିତ
ହୁଅଇ ଜଗତଜିତା,
ନାହିଁ ମନେ ଆନ ଚିନ୍ତା
ତୁମରି ଚରଣେ ନେଉଛୁ ଶରଣ
ମୁକ୍ତି ଦିଅ ମୁକ୍ତିଦାତା ।
ହେ ଗଣାଧିପତି ଗଉରୀ ନନ୍ଦନ
ଏତିକି କରୁ ଗୁହାରି,
ଦିଅ ସତ୍ ବୁଦ୍ଧି ଦିଅ ଦିବ୍ୟଜ୍ଞାନ
ବାଧା ବିଘ୍ନ ଦୂର କରି,
ଝରୁ ଶୁଭାଶିଷ ବାରି,
ଅଜ୍ଞାନ ଅନ୍ଧାର ଦୂର ପ୍ରଭୁ କର
ଜ୍ଞାନର ଆଲୋକ ଭରି ।
– ଜନ୍ମଜୟ ନାୟକ
Comments
ଜନ୍ମଜୟ ନାୟକ ପେଶାରେ ଜଣେ ସରକାରୀ ଶିକ୍ଷକ, କିନ୍ତୁ ନିଶା ତାଙ୍କର ଗପ ଓ କବିତା ଲେଖିବା । ପୁରୀ ଜିଲ୍ଲାର ଚିଲିକା ନୋଡାଲ ହାଇସ୍କୁଲରେ କାର୍ଯ୍ୟରତ ଥିବା ଏହି ଶିକ୍ଷକଙ୍କର ଗପଗୁଡ଼ିକ ଅନେକ ପତ୍ରିକପତ୍ରିକାରେ ସ୍ଥାନିତ ହୋଇଛି ।
