ଦିଅ ଦିବ୍ୟଜ୍ଞାନ ଦିଅ ଶୁଭବୁଦ୍ଧି
ଆହେ ସିଦ୍ଧି ବିନାୟକ
ସଞ୍ଜ ଆଳତୀରେ ପ୍ରାର୍ଥନା ସଭାରେ
ତୁମେ ହିଁ ପ୍ରଥମ ଶ୍ଳୋକ ।
ତୁମ ଆଶିଷରୁ ବିଦ୍ୟା ମହାଧନ
ସହଜେ ଲାଭ ହୁଅଇ
ମହାଜ୍ଞାନୀ ବୋଲି ସାରା ସଂସାରରେ
ପ୍ରଶଂସା ସିଏ ଲଭଇ ।
ମୂଷିକ ବାହନ ହେ ଗଜ ବଦନ
ତୁମେ ଦୟାର ସାଗର
ତୁମ ଆଗମନେ ହରଷିତ ମନେ
ଚାହିଁଛି ସାରା ସଂସାର ।
ସକଳ ଶକ୍ତିର ତୁମେ ହିଁ ଆଧାର
କୋଟି ସୂର୍ଯ୍ୟ ତୁମ ଜ୍ୟୋତି
ତୁମେ ମହାରଥି ଆହେ ଗଜପତି
ତୁମ ବିନୁ ନାହିଁ ଗତି ।
ହେ ଗୈାରୀ ନନ୍ଦନ ବିଘ୍ନ ବିନାଶକ
ଗୁଣନିଧି ଗଜାନନ
କାର୍ତ୍ତିକେୟ ଭ୍ରାତା ପ୍ରଭୁ ଶ୍ରୀ ଗଣେଶ
ଜ୍ଞାନଦାତା ଭଗବାନ ।
ଅଗ୍ରପୂଜ୍ୟ ଦେବ ପିତା ମହାଦେବ
ମାତା ପାର୍ବତୀଙ୍କ ସୂତ
ମାତାଙ୍କ ଆଦେଶେ ରହି ଦ୍ଵାର ଦେଶେ
ପାଳିଥିଲ ତୁମେ ବ୍ରତ
ବୁଣ ପୁଣ୍ୟ ବୀଜ ଏ ଭବ ସଂସାରେ
ପ୍ରଭୁ ସିଦ୍ଧି ବିନାୟକ
ଅବତରି ଆସ ତୁମେ ଏ ଧରାକୁ
ସାଜି ବିଘ୍ନ ବିନାଶକ ।
– ବାପିନି ସିଂ
Comments
ବାପିନି ସିଂ
ବାପିନି ସିଂ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
