ଏଇ ମୋର ଛୋଟ ଗାଆଁରେ
ତାକୁ ଟିକେ ଚାହାଁରେ,
ଜନମ ଏଇଠି, ମରଣ ଏଇଠି
ପାଳିଆବିନ୍ଧା ତା’ର ନାଆଁରେ ।
ବୁଢ଼ା ଅଙ୍କା ବଙ୍କା ବାଡ଼ି ପରି
ଅଙ୍କେଇ ବଙ୍କେଇ ହେଇ
କୁଣ୍ତି ନଈ ଗାଆଁ ମଝିରେ ଯାଇଛି ବହି,
ବରଷା ଋତୁରେ ଗାଆଁ ନଈ ମୋର ଊଛୁଳେ
ଘାଟରେ ପଡ଼େ ନାଆ
ଏଇ ମୋର ଛୋଟ ଗାଆଁ,
ପାଳିଆବିନ୍ଧା ତା’ର ନାଆଁ ।
ଗାଆଁ ଶେଷ ମୁଣ୍ଡେ
ବିଖ୍ୟାତ ଦେବତା
ପ୍ରଭୁ ବିରଞ୍ଚିନାରାୟଣ ମନ୍ଦିର ରହି ପାଆନ୍ତି ପୂଜା,
ସବୁ ବିପଦୁ ମୋ ଗାଆଁ ଲୋକଙ୍କୁ ହୁଅନ୍ତି ସାହା,
ଏଇ ମୋର ଛୋଟ ଗାଆଁ
ପାଳିଆବିନ୍ଧା ତା’ର ନାଆଁ ।
ମନ୍ଦିର ପରି ଗାଆଁ ଚାହାଳି,
ଆମ ଗାଆଁ ପିଲାଙ୍କ ମିଳନସ୍ଥଳୀ
ପଢ଼ନ୍ତି ପାଠ ଧରି ସିଲଟ ଖଡ଼ି,
ଲେଖନ୍ତି- ଅ, ଆ,
ଏଇ ମୋର ଛୋଟ ଗାଆଁ
ପାଳିଆବିନ୍ଧା ତା’ର ନାଆଁ ।
ବାର ମାସରେ ତେର ପରବ
ଖୁସିରେ ପାଳନ୍ତି କରି ମଉଜ,
ଏଠି ସମସ୍ତଙ୍କୁ ସମସ୍ତେ ହୁଅନ୍ତି ସାହା
ଏଇ ମୋର ଛୋଟ ଗାଆଁ
ପାଳିଆବିନ୍ଧା ତା’ର ନାଆଁ ।
– ଅନନ୍ତ କୁମାର ସାହୁ
Comments
ଅନନ୍ତ କୁମାର ସାହୁ ଜଣେ ଓଡ଼ିଆ କବି, ଯିଏକି ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ରଚନା କରିଥାନ୍ତି ।
