ରକ୍ତର ନଦୀ ବୁହାଇ
ରାଜ୍ୟ ପରେ ରାଜ୍ୟ ଜିଣି
ରାଜା ପରି ଦେଖିବାକୁ ତତେ ।
ମୋର ଯାହା ଶେଷ ଇଚ୍ଛା
ଜଣାଇ ଦେଉଛି ତେଣୁ
ତତେ ଏଇ ପତରରେ ।
ତୋ ପାଇଁ ସାଇତିଛି ଧନ
ଛୋଟ ଏକ ଦୀପଟିଏ
ନାଶିବାକୁ ତମସାକୁ
କର୍ତ୍ତବ୍ୟକୁ ତେଲ କରି,
ତ୍ୟାଗର ସଳିତା ଦେଇ
ତୋ ଦୀପ୍ତ ଶିଖାରେ ।
କେବେ ତୁ ସକ୍ଷମ ହବୁରେ ଧନ !
ପଢ଼ିବାକୁ ମୋ ମନର
ଅକୁହା ଭାଷାକୁ ।
ସାତ ତାଳ ପଙ୍କ ମଧ୍ୟେ
ଅଛି ଏକ ସୁନାର ସିନ୍ଦୁକ
ତହିଁରେ ଅଛିରେ ଧନ
ହୀରାର ମୁକୁଟ ।
ବୁଢ଼ୀ ଅସୁରୁଣୀକୁ ମାରି
ସେ ମୁକୁଟ ଆଣିବାକୁ କେବେ କହିବିନି ତତେ ।
ଏଇ ଆମ ଦେଶର
ମାଟି, ପାଣି ଓ ପବନକୁ ଅନୁଭବି,
ତୋ କଅଁଳ ମନରେ ବୁଝିଯିବୁ ଯେବେ,
ତେବେରେ ସମର୍ଥ ହେବୁ
କୋଟି କୋଟି ହୃଦୟ ଜିଣି
ତୋଳିବାକୁ ଏକ ଶ୍ରଦ୍ଧାର ସାମ୍ରାଜ୍ୟ ।
ତେବେ ଯାଇଁ ପାଇବୁରେ ଧନ
ହୀରଠାରୁ ମୂଲ୍ୟବାନ ସେଇ ଯଶର ମୁକୁଟ ।
ଆଉ ପୁରା ହେବ ମୋର ଶେଷ ଇଚ୍ଛା ।
– ଅନ୍ନପୂର୍ଣ୍ଣା ଧଳ
Comments
ଅନ୍ନପୂର୍ଣ୍ଣା ଧଳ
ଅନ୍ନପୂର୍ଣ୍ଣା ଧଳ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
