ଦ୍ରବ ଦ୍ରାବକର ସମ ସଖି ଆମେ
ଗଢ଼ିବା ପ୍ରେମ ଦ୍ରବଣ
ମିଶିଯିବା ଦୁହେଁ ମିଶେ ଯେମିତିକା
ସମଜାତୀୟ ମିଶ୍ରଣ ॥
ଲୁହା ଚୁମ୍ବକର ସମ୍ପର୍କ ପରିକା
ହେଉଥିବା ଆକର୍ଷିତ
ବାହ୍ୟଚାପ କେବେ ରୋକି ପାରିବନି
ହୋଇବାକୁ ଏକତ୍ରିତ ॥
ରାସାୟନିକ ପରିବର୍ତ୍ତନ ପରି
ହେବନାହିଁ ଆମ ପ୍ରେମ
ବନ୍ଧନ ଆମର ହୋଇବ ଯେମିତି
ଭୌତିକ ପରିବର୍ତ୍ତନ ॥
ଧାତୁ ସମ ଆମେ କଠିନ ରହିବା
ଆସୁ ଯାହା ପରିସ୍ଥିତି
ସୁନା ପରି ଆମ ଔଜ୍ଜଲ୍ୟର ଗୁଣ
ଆଣିଦେବ ଜହ୍ନରାତି ॥
ପ୍ରେମ ଦହନରେ ଶିଖା ସୃଷ୍ଟି ପାଇଁ
ସାଜିବା ଦାହ୍ୟ ପଦାର୍ଥ
ଦିଆସିଲି କାଠି ବାରୁଦର ପରି
ଜୀବନ ହେବନି ବ୍ୟର୍ଥ ॥
ମୁଁ ହୋଇଯିବି ଆପତିତ ରଶ୍ମି
ତୁମେ ମୋ ପ୍ରତିଫଳିତ
ଆଙ୍କିଦେଇ ଏକ ପ୍ରେମ ଅଭିଲମ୍ବ
କରୁଥିବି ଆଲୋକିତ ॥
ପ୍ରେମ ହେବନାହିଁ ଲିଟମସ୍ କାଗଜ
ହେବନାହିଁ କ୍ଷଣସ୍ଥାୟୀ
ଅମ୍ଳୀୟ କ୍ଷାରୀୟ ପାରିବେନି କେବେ
ପ୍ରେମରଙ୍ଗ ବଦଳେଇ ॥
ପଦାର୍ଥ ପୃଥିବୀ ସାଜିବା ଗୋ ଦୁହେଁ
ଟାଣିବ ମାଧ୍ୟାକର୍ଷଣ
ଆଶାଅଛି କେବେ ଥମିଯିବ ନାହିଁ
ପ୍ରେମର ଏ ଆବର୍ତ୍ତନ ॥
– ପ୍ରଶାନ୍ତ କୁମାର ପଧାନ
Comments
ପ୍ରଶାନ୍ତ କୁମାର ପ୍ରଧାନ
ପ୍ରଶାନ୍ତ କୁମାର ପ୍ରଧାନ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
