ଆଗତ ଫଗୁଣ ଶୁକ୍ଳ ତୃତୀୟାର
ମୀନ ଚନ୍ଦ୍ରେ ଶୁଭ ଲଗ୍ନ
ଜନ୍ମ ଜନ୍ମାନ୍ତର ସଂପର୍କ
କଟିରେ ବନ୍ଧା ହେବା ସେହି କ୍ଷଣ ॥
ଦିନ ଗଣୁଅଛି ଆହେ ପ୍ରଣୟିନୀ
ଉଛୁରା ମନ ମୋ ଚାପି
ହୃଦୟ ଝରକା ଖୋଲା ରଖିଅଛି
ଆସିବକି କାଳେ ଛପି ॥
ପ୍ରତିଟି ମୂହୁର୍ତ୍ତ ଲାଗେ ଶତ ଯୁଗ
ସ୍ଥିର ଲାଗେ ମହୀ ଗତି
ପରୀକ୍ଷା କି ନିଏ ନିୟତି ମୋହର
ଧୈର୍ଯ୍ୟ ତରାଜୁରେ ନାପି ॥
ମାନସେ ଝଟକେ ସୁପ୍ରତିମା ତବ
ପହିଲି ନଜର ଛବି
କୁଞ୍ଚିତ କେଶର ଅମାନିଆ ଲଠ
ଭାଷୁଥିଲ ମୃଦୁ ଲାଜି ॥
ମୁଖୁଡ଼ା କମଳେ ଭ୍ରମର ଭ୍ରୁଲତା
ହୃଦୟେ ଯାଇଛ ଲାଖି
ତରଙ୍ଗ ଚକ୍ଷୁରେ ପ୍ରୀତିର ଲହଡ଼ା
ମନେ ମୋ ଜୁଆର ତାତି ॥
ପ୍ରଣୟିନୀ ଗୋ ମୋ ସପନ ନାଗରୀ
ହେବ କି ବାସ୍ତବେ ସଖି
ଯୋଗୀ ପରି ତୁମ ନାମଯୋଗେ ଅଛି
ପ୍ରେମମାଳା ଜପି ଜପି ॥
– ଶ୍ରୀକାନ୍ତ ପଧାନ
Comments
ଶ୍ରୀକାନ୍ତ ପଧାନ
ଶ୍ରୀକାନ୍ତ ପଧାନ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
