You are currently viewing ଫୁଲଟିଏ
ଫୁଲଟିଏ

ଫୁଲଟିଏ

ଫୁଲଟିଏ ଫୁଟୁଚି ବୋଲି ତ
ବଗିଚାଟି ଦିଶୁଚି ସୁନ୍ଦର
ପବନର ଖିଲି ଖିଲି ହସରେ
ଫୁଲର ସୁଗନ୍ଧରେ
ମହକୁଚି ପରିବେଶ ।

ପ୍ରଜାପତି ଡେଣା ଝାଡ଼ି ଝାଡ଼ି
ବୁଣି ଦେଉଛି ମଧୁ
ମତୁଆଲା ମହୁମାଛି
ଗୁଣୁଗୁଣୁ ହୋଇ ଗାଉଅଛି
ମିଳନର ମଧୁର ସଙ୍ଗୀତ ।

ଢାଳି ଦେଉଛନ୍ତି ରବି
ଅସରନ୍ତି ରଙ୍ଗର ଅବିର
ଗଛଲତା ନଇଁ ପଡ଼ୁଛନ୍ତି
ପେନ୍ଥା ପେନ୍ଥା ଫୁଲର ସମ୍ଭାରେ ।

ଆଉ କାଳିଆର ମନ ହେଉଛି
ସଜେଇ ହେବାକୁ
ସେ ଫୁଲର ଗଜରା ହାରରେ ।

ଫୁଲଟିକୁ ଯଦି କେହି
ଫୁଟିବାରୁ କରିବ ବଞ୍ଚିତ
ଦଳି ମକଚି ଖିନ୍‌ଭିନ୍ କରିଦେବ ତା’ର ସୁନ୍ଦରତା ।

ତା’ ହେଲେ………
କ’ଣ ସୃଷ୍ଟି ଆଉ ଦିଶିବ ସୁନ୍ଦର?
ନା ରଙ୍ଗ ବେରଙ୍ଗ ପ୍ରଜାପତି ସମ୍ଭାରରେ
ହସିବ ବଗିଚା???

ନା ଶୋଭା ପାଇବ କାଳିଆର ଗଳାରେ
ଗଜରାର ହାର?
ସୃଷ୍ଟି ପାଲଟି ଯିବ
ସୁରଭି ବିହୀନ କାଗଜ ଫୁଲର ବଗିଚା ପରି ।

ଯେଉଁଠି ନ ଥିବ ସ୍ନେହ, ପ୍ରେମ
ଆଉ ନିବିଡ଼ତାର ମଧୁର ପୁଲକ
ମଧୁପର ଗୁଞ୍ଜନରେ
ଶୁଭୁଥିବ ଖାଲି ବିରହର ବେସୁରା ସଙ୍ଗୀତ ।

Comments

comments

ଅନ୍ୟମାନଙ୍କ ସହ ସେୟାର କରନ୍ତୁ...

ଶାନ୍ତିଲତା ରଥ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ରଚନା କରନ୍ତି ।