ଅଛି ସେ କଦମ୍ବ ବନ
ଶୁଭୁନି ମୁରଲୀ ସ୍ଵନ
ନଦୀ ପଠା ଲାଗେ ଖାଲି,
ଶ୍ରୀହୀନ ଲାଗେ ମନ ବୃନ୍ଦାବନ
କହ୍ନେଇ ନାହିଁତ ବୋଲି ।
ଲୁଚେଇ କାନ୍ଦେ ରାଧିକା
ଚଉଦିଗ ହେଲା ଫିକା
ଗହନ ଗୁମର ପ୍ରୀତି
ସରଗ ସୁଷମା ହୀନ ତା ଉପମା
ସରାଗେ ନଥାଏ ମତି ।
ପୁରିଛି ଲବଣୀ ହାଣ୍ଡି
ଯଶୋଦା ପାରୁନି ଦଣ୍ଡି
ବସି ଖୁଆ ବାଡ଼ି ପାଶେ
ବାତ୍ସଲ୍ୟ ମମତା ନୟନ ଯୁଗଳୁ
ଧାର ଧାର ବୋହି ଆସେ ।
ନିଛାଟିଆ କ୍ରୀଡ଼ାଭୂଇଁ
ସଞ୍ଜ କି ଆସିଲା ନଇଁ
ଗୋପ ଚାଟ ମେଳେ ଫାଟ,
ଭାଙ୍ଗିଲା ମନର କୌତୁକ ଭିଆଣ
ଭ୍ରମଣ ରମଣ କଷ୍ଟ ।
ଉଡ଼ୁନି ଗୋଗୋଷ୍ଠ ଧୂଳି
ଶୁଭୁନି ଘଣ୍ଟି ଘାଗୁଡ଼ି
ନାହିଁ ଗାଁ ଦାଣ୍ଡେ ଭେଟ,
ଛାତିର ଛନକା ମଉଳି ଗଲାଣି
ପ୍ରାଣ କି ଛାଡ଼ିବ ଘଟ ।
– ଶ୍ରୀନିବାସ ସାମଲ
Comments
ଶ୍ରୀନିବାସ ସାମଲ
ଶ୍ରୀନିବାସ ସାମଲ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
