ଦେଖିନି ପାଖରୁ ଜୀବନକୁ କେବେ
ଏକାନ୍ତରେ ବସି ଯେବେ ମୁଁ ଭାବେ –
ହସିକି କାନ୍ଦେ, କାନ୍ଦିକି ହସେ
ଜୀବନଟା ବୋଧେ ଏମିତି ଦିଶେ ।
ନଦୀ ବହିଯାଏ ସମୁଦ୍ର ଆଡ଼େ
କେତେ ଅଙ୍କା ବଙ୍କା ପଥ ହାବୁଡ଼େ –
ପଥର କାଟେ, ପାହାଡ଼ୁ ଖସେ
ଜୀବନଟା ବୋଧେ ଏମିତି ଦିଶେ ।
କିଛି ଚିରସ୍ଥାୟୀ ନୁହେଁ ସଂସାରେ
କେତେ ଝଡ଼ ଝଞ୍ଜା ଆସେ ରାସ୍ତାରେ –
ମାଟିର ଦେହ, ମାଟିରେ ମିଶେ
ଜୀବନଟା ବୋଧେ ଏମିତି ଦିଶେ ।
ସବୁ ପ୍ରାଣୀଙ୍କର ଗୋଟେ ବିଚାର
ପେଟ ପୂରିଗଲେ ନୁହେଁ କାହାର –
ଖାଦକ ଆସେ, ଖାଦ୍ୟ ପାଶେ
ଜୀବନଟା ବୋଧେ ଏମିତି ଦିଶେ ।
କର୍ମର ବିକଳ୍ପ କିଛି ତ ନାହିଁ
ଭାଗ୍ୟକୁ ସମସ୍ତେ ରୁହନ୍ତି ଚାହିଁ –
ମଣିଷ ମନ, ସ୍ୱପ୍ନରେ ଭାଷେ
ଜୀବନଟା ବୋଧେ ଏମିତି ଦିଶେ ।
ଥିଲେ ଥାଉ ପଛେ ଗୁଣ ହଜାର
ଥୁଣ୍ଟ। ଗଛ ପାଏ ନାହିଁ ଆଦର –
ଫୁଲଟି ଫୁଟେ, ପବନ ବାସେ
ଜୀବନଟା ବୋଧେ ଏମିତି ଦିଶେ ।
ଲୋଭଠୁ ଉର୍ଦ୍ଧ୍ୱରେ ଯେ ପାରେ ରହି
ବୁଦ୍ଧିମାନ ପ୍ରାଣୀ ବୋଲାଏ ସେହି –
ବାଘ ବି ଫସେ, ଶିକାରୀ ଫାସେ
ଜୀବନଟା ବୋଧେ ଏମିତି ଦିଶେ ।
କଲେ ଥରେ କାଳ ସର୍ପ ଦଂଶନ
ଯେତେ ଲଗେଇଲେ ଘୃତ ଚନ୍ଦନ –
ବିଷର କୋପ, ବିଷ ହି ନାଶେ
ଜୀବନଟା ବୋଧେ ଏମିତି ଦିଶେ ।
– ଚିନ୍ମୟ କୁମାର ସାହୁ
Comments
ଚିନ୍ମୟ କୁମାର ସାହୁ
ଚିନ୍ମୟ କୁମାର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ଆଦି ରଚନା କରନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
