ନମସ୍କାର ବନ୍ଧୁଗଣ !
ମୁଁ ଆଶିଷ, ଆସନ୍ତୁ ଆପଣଙ୍କୁ ଗୋଟେ ଛୋଟ କାହାଣୀ କହୁଛି; ମକର ଚାଉଳର କାହାଣୀ…
ଧନୁ ସଂକ୍ରାନ୍ତିରେ ମୁଆଁ ଭାର ନେଇ ଏକମାସ ପାଇଁ ବାପ ଘରକୁ ଯାଇଥିବା ମା’ ଲଷ୍ମୀ ଶ୍ରୀମନ୍ଦିରକୁ ଫେରନ୍ତି ମକର ସଂକ୍ରାନ୍ତି ଦିନ । ମହାପ୍ରଭୁ ତଥା ବଡ଼ ସାଆନ୍ତଙ୍କ ମାନ ଭଞ୍ଜନ ପାଇଁ ବାପଘରୁ ସାଥିରେ ଆଣି ଆସିଥାନ୍ତି ସେହି ଋତୁର ନୂତନ ଚାଉଳରେ ପ୍ରସ୍ତୁତ ସ୍ୱାଦିଷ୍ଟ ମକର ଚାଉଳ । ମକର ଚାଉଳର ଭୋଗ ଖାଇ ତୃପ୍ତ ହୁଅନ୍ତି କାଳିଆ ସାଆନ୍ତ; ମାନ ଭଞ୍ଜନ ହୁଏ ତାଙ୍କର । କେଉଁ ଯୁଗରୁ ଶ୍ରୀମନ୍ଦିରରେ ଏ ପ୍ରଥା ଚାଲି ଆସୁଛି ଏମିତି । ମକର ଚାଉଳ ଖାଲି ଯେ ଆମ ସଂସ୍କୃତି ସହ ଯୋଡ଼ି ହେଇ ରହିଛି ତାହା ନୁହେଁ, ବରଂ ଏହା ଆମ କୃଷିଭିତ୍ତିକ ପର୍ବ ପର୍ବାଣୀର ଆଉ ଏକ ଅନନ୍ୟ ଉଦାହରଣ । ସଦ୍ୟ ଅମଳ ଧାନର ଚାଉଳ, ଆଖୁର ଗୁଡ଼, ବାଡ଼ି ନଡ଼ିଆ ଆଦିରେ ପ୍ରସ୍ତୁତ ମକର ଚାଉଳ ଯେତିକି ସ୍ୱାଦିଷ୍ଟ ସେତିକି ସ୍ୱାସ୍ଥ୍ୟକର ମଧ୍ୟ । ତା’ହେଲେ କେମିତି ପ୍ରସ୍ତୁତ ହୁଏ ଏହି ମକର ଚାଉଳ ଆସନ୍ତୁ ଜାଣିବା;
ଆବଶ୍ୟକ ସାମଗ୍ରୀ:-
- ନୂଆ ଅରୁଆ ଚାଉଳ
- ଗୁଡ଼/ଚିନି
- ନଡ଼ିଆ କୋରା
- ଛେନା
- ପାଚିଲା କଦଳୀ
- ଅଦା
- ଗୋଲ ମରିଚ
- ଖାଇବା କର୍ପୂର
(ଆପଣ ଚାହିଁଲେ ଏଥିରେ ଆପଣଙ୍କ ପସନ୍ଦର ଫଳ ମୂଳ ଛୋଟ ଛୋଟ ଖଣ୍ଡ କରି ପକାଇ ପାରିବେ । ମକର ଚାଉଳରେ ମୁଖ୍ୟତଃ ଗୁଡ଼ ପଡ଼େ । କିନ୍ତୁ ଆପଣ ଚାହିଁଲେ ଚିନି ପକେଇ ପାରିବେ ।)
ଦୁଇରୁ ଚାରି ଘଣ୍ଟା ବତୁରା ଯାଇଥିବା ଦୁଇ କପ୍ ନୂଆ ଚାଉଳକୁ ପ୍ରଥମେ ଛେଚି ଗୁଣ୍ଡ ଗୁଣ୍ଡ କରନ୍ତୁ । ସେଥିରେ ଏକ କପ୍ ନଡ଼ିଆ କୋରା, ଏକ କପ ଛେନା, ଦୁଇଟି ପାଚିଲା କଦଳୀ ଓ ସ୍ୱାଦ ଅନୁସାରେ ଗୁଡ଼ ବା ଚିନି ପକେଇ ଚକଟି ଦିଅନ୍ତୁ । ସବୁ ଜିନିଷ ଭଲ ଭାବେ ମିଶିଗଲା ପରେ ସେଥିରେ ଗୋଟେ ଚାମଚ ଅଦା ଛେଚା, ଗୋଟେ ଚାମଚ ଗୋଲ ମରିଚ ଗୁଣ୍ଡ ଓ ଅଳ୍ପ ଖାଇବା କର୍ପୂର ଦେଇ ଆଉଥରେ ଭଲରେ ଗୋଳେଇ ଦିଅନ୍ତୁ । ଏବେ ପ୍ରସ୍ତୁତ ହେଇଗଲା ମକର ଚାଉଳ । ଦେଖିଲେ କେତେ ସହଜ ! ତେବେ ଏଇ ମକର ସଂକ୍ରାନ୍ତିରେ ଆପଣ ବି ଘରେ ଏମିତି ମକର ଚାଉଳ ପ୍ରସ୍ତୁତ କରନ୍ତୁ ନା !!!
ହଉ ରହିଲି ଆଜ୍ଞା
ନମସ୍କାର
Comments
ଆଶିଷ କୁମାର ନାୟକ
ଆଶିଷ କୁମାର ନାୟକ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
