ବସନ୍ତେ ଫୁଲେଇ ଫଗୁଣ ମାସେ
ବରଷକେ ଥରେ ହୋଲିଟି ଆସେ
ରଙ୍ଗର ପସରା ସାଥିରେ ନେଇ
ପ୍ରେମର ଫଗୁରେ ସଜେଇ ହେଇ
କୋଇଲିର କୁହୁତାନର ତାଳେ
ବଗିଚାରେ ପୁଣି ଆମ୍ବ ବଉଳେ
କୃଷ୍ଣଚୂଡ଼ା ସାଜେ ଧରଣୀ ଗଭା
ଆକାଶେ ସୂର୍ଯ୍ୟଙ୍କ ସ୍ୱର୍ଣ୍ଣିମ ଆଭା
ପଳାସ ପାଟର ରକ୍ତିମ କାନି
ମେଲାଇ ବସିଛି ପ୍ରକୃତି ରାଣୀ
ସୁନୀଳ ଆକାଶେ ମଳୟ ଭାସେ
ରଜନୀ ଗନ୍ଧା ଓ ମଲ୍ଲିକା ବାସେ
ନଥାଏ ଗରମ କି ଥଣ୍ଡାର ଡର
ବୈଶିଷ୍ଟ୍ୟତା ଏହି ଏ ବସନ୍ତର
ସବୁ ୠତୁଠାରୁ ସ୍ୱତନ୍ତ୍ର ସେହି
ଋତୁରାଜ ବୋଲି ବୋଲାଏ ତହିଁ
ବିମାନରେ ବସି ରାଧା ଗୋବିନ୍ଦ
ସାହି ସାହି ବୁଲି ଭାରି ଆନନ୍ଦ
ତାଙ୍କରି ପାଦରେ ମୁଣ୍ଡ ନୁଆଁଇ
ସ୍ନେହ ପ୍ରେମ ରଙ୍ଗ ଦେବା ଲଗାଇ
କ୍ରୋଧ ହିଂସା ହେଉ ଜୀବନୁ ଦୂର
ସଭିଙ୍କୁ ଶୁଭେଚ୍ଛା ହୋଲି ପର୍ବର
– ଚିନ୍ମୟ କୁମାର ସାହୁ
Comments
ଚିନ୍ମୟ କୁମାର ସାହୁ
ଚିନ୍ମୟ କୁମାର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ଆଦି ରଚନା କରନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
