ଅଙ୍କ ଅବଧାନେ, କହନ୍ତି ପିଲାଏ…
ପଢ଼ିବକି, ଜୀବନ ପାଠ…
ଯୋଗ, ବିଯୋଗର, କାହାଣୀ ଶୁଣାଏ…
ଗୁଣିତ, ବିଭକ୍ତର ସାଠ ।
ପହିଲି ପାଠଟି, ଶୁଣରେ ପିଲାଏ…
ଯୋଗର ଗାରିମା କେତେ?
ଜୀବନରେ ତା’ର ମହତ୍ୱ ବୁଝାଏ…
ଖୁସି ବାଣ୍ଟିବାରେ ଯେତେ ।
ଦ୍ଵିତୀୟ ପାଠଟି, ବୁଝିଲ ବାଳକେ…
ବିଯୋଗର ମୂଲ କେତେ?
ଇର୍ଷା, ଦ୍ୱେଷ, ଛନ୍ଦ, କପଟ, ବିଯୋଗେ…
ଜୀବନ ସୁନ୍ଦର ସତେ ।
ତୃତୀୟ ଶିକ୍ଷାଟି, ଜାଣରେ ପିଲାଏ…
ଗୁଣିତ ମୂଲ୍ୟର ମୂଲ…
ପ୍ରେମ ବିତରଣେ ସୁନ୍ଦର ଧରା ଏ…
କିଏ ହେବ ସମତୁଲ ।
ଚତୁର୍ଥ ପାଠଟି, ଶୁଣାଏ ଚାଟରେ…
ବିଭକ୍ତର, ଗୁରୁ ମନ୍ତ୍ର…
କର୍ତ୍ତବ୍ୟ ଓ ସେବା ଭାଗ କରିବାରେ…
ବ୍ୟାପେ ଯଶ, ଖ୍ୟାତି ସର୍ବତ୍ର ।
ଜୀବନ ଅଙ୍କର ଗାରିମା ବୁଝିଲ…
ମନ ଦେଇ ମୋର ଚାଟ…
ଏ ପାଠ ପଢ଼ିଲେ ଦୁନିଆ ଜିତିବ…
ନିଶ୍ଚେ ମିଳିବ ସତ୍ୟର ବାଟ ।
ଅବଧାନେ କହୁଥିଲେ, ସର୍ବଦା…
ଏହି କଥା ହେଯିବୁ ସଦା…
ହର, ଗୁଣ, ଫେଡ଼େ, ମିଶା…
ଆଉ ସବୁ ପାଠ, ଚାଳରେ ଖୋସା ।
ଅବଧାନେଙ୍କର ଗଣିତ ସାଧନା…
ମନେ ରଖିଥିବୁ ସର୍ବେ…
ଜୀବନ ଗଢ଼ିବୁ, ସୁନ୍ଦର, ସରସ
ପାରିହେବୁ ମହା ଭବେ ।
– ନିର୍ମଳ ନାୟକ
Comments
ନିର୍ମଳ ନାୟକ
ନିର୍ମଳ ନାୟକ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
