ଶୀତଳ ପବନେ
କାକର ବିନ୍ଦୁରେ
ଆସିଛି ପୁଣି ଶୀତ,
ହଁ ଗାଁରେ ପଡ଼ିଛି ଶୀତ ।
କାର୍ତ୍ତିକ ପୂର୍ଣିମା
ଡଙ୍ଗାରେ ବସିକି
ଆସିଛି ପୁଣି ଶୀତ,
ହଁ ଗାଁରେ ପଡ଼ିଛି ଶୀତ ।
ଦିନର ଆୟୁଷ
ଶୋଷଣ କରିକି
ଆସିଛି ଜରତୀ ଶୀତ,
ହଁ ଗାଁରେ ପଡ଼ିଛି ଶୀତ ।
ନିରବ ନିସ୍ତବ
ରଜନୀକୁ ନେଇ
ଆସିଛି ପୁଣି ଶୀତ,
ହଁ ଗାଁରେ ପଡ଼ିଛି ଶୀତ ।
ମାଲୁଣୀ ବୁଢ଼ୀର
କୁହୁକ ପରି
ଘେରା କୁହୁଡ଼ି କବଚ,
ହଁ ଗାଁରେ ପଡ଼ିଛି ଶୀତ ।
ମୁକ୍ତା କଣାର
ଭ୍ରମ ସୃଷ୍ଟି କରେ
ଶୀତଦିନ ସୂର୍ଯ୍ୟକିରଣ,
ହଁ ଗାଁରେ ପଡ଼ିଛି ଶୀତ ।
ରଇତ ହାତରେ
ଦା’ ଧରାଇ
କ୍ଷେତକୁ ଦେଖାଏ ବାଟ,
ହଁ ଗାଁରେ ପଡ଼ିଛି ଶୀତ ।
କମ୍ପିତ କଣ୍ଠରେ
ଗାଁ ବୁଢ଼ୀ ଓଠୁ
ଶୁଭୁଛି ଜପପାଠ,
ହଁ ଗାଁରେ ପଡ଼ିଛି ଶୀତ ।
ସଞ୍ଜବେଳରେ
ପଶ୍ଚିମ ଆକାଶେ
ଦିଶିଲାଣି ନାଲି ସୂର୍ଯ୍ୟ,
ହଁ ଗାଁରେ ପଡ଼ିଛି ଶୀତ ।
ବରଗଛ ମୂଳେ
ନିଆଁ ଉହେଇ
ବସିଛନ୍ତି ଗାଁ ବୃଦ୍ଧ,
ହଁ ଗାଁରେ ପଡ଼ିଛି ଶୀତ ।
ଦିଗନ୍ତବିସ୍ତୀର୍ଣ୍ଣ
ପାଚିଲା ଧାନକୁ
ସୋରିଷ ଫୁଲର ଦୃଶ୍ୟ,
ହଁ ଗାଁରେ ପଡ଼ିଛି ଶୀତ ।
ଧବଳ ଝୋଟିରେ
ନୂଆବୋହୂ ପୁଣି
ସଜେଇଛି ଗାଁ ଦାଣ୍ଡ,
ହଁ ଗାଁରେ ପଡ଼ିଛି ଶୀତ ।
ଗାଁରେ ଶୀତ
ଭାରି ମନୋରମ
ଉଲ୍ଲସିତ ଉତ୍ସାହିତ
ନଥାଏ ଆର୍ଦ୍ରତା କିମ୍ୱା ରୁକ୍ଷତା,
ପଲ୍ଲୀର ମୀତ ସେ ଶୀତ ।
– ରୁଦ୍ର ନାରାୟଣ ପାଣିଗ୍ରାହୀ
Comments
ରୁଦ୍ର ନାରାୟଣ ପାଣିଗ୍ରାହୀ
କଟକ ଜିଲାର ସାଲେପୁର ସ୍ଥିତ ପୂର୍ବଛକର ବାସିନ୍ଦା ହେଉଛନ୍ତି ରୁଦ୍ର ନାରାୟଣ ପାଣିଗ୍ରାହୀ । ସେ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ/କବିତ ଆଦି ରଚନା କରିଥାନ୍ତି । ତାଙ୍କ ରଚିତ କବିତାମାନ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇଛି ।
