ଦୀପ୍ତି ରେଖା ଉଜ୍ୱଳ ଜ୍ୟୋତି ଶିଖା
ପ୍ରଜ୍ୱଳିତ ଆଜି ଘରେ ଘରେ
ଅନ୍ଧକାର ଛାୟା ଅପସରି ଲୀନ
ଆଲୋକ ରଶ୍ମି ଗର୍ଭରେ ।
ଦାଣ୍ଡ ଅଗଣା ସୁସଜ୍ଜିତ ଆଜି
ସପ୍ତରଙ୍ଗୀ ମୁରୁଜ ବିଞ୍ଚା ହୋଇ
ଖୁସି ମଉଜର ସମାଗମ ହୁଏ
ଗୃହେ ଆଲିଙ୍ଗନ ଦେଇ ।
ପିଠାପଣାର ଭୂରି ଭୂରି ବାସ୍ନା
ବାଣ୍ଟେ ଦୀପାବଳି ଶୁଭେଚ୍ଛା
ପ୍ରାଣରୁ ଉଦର ବାସ୍ନାରେ ଭରି
ବଢ଼ାଏ କ୍ଷୁଧାର ଇଛା ।
ଆରିସା, କାକରା, ମଣ୍ଡା ଆଉ କ୍ଷୀରି
ସଜାନ୍ତି ପୂଜା ପସରା,
ବଡ଼ବଡ଼ୁଆଙ୍କୁ କରି ନିମନ୍ତ୍ରଣ
ବଢ଼ାନ୍ତି ଶୋଭା ଦ୍ଵିଗୁଣ ।
ଦଶ ଦିଗ ହୁଏ ଉତ୍ଫୁଲ୍ଲ ଆଜି
କୋଳାହଳେ ପଡ଼େ ଫାଟି
ହିନ୍ଦୁ ସଂସ୍କୃତିର ପରିଚୟ ଦେଇ
ଗରବେ ଫୁଲାଏ ଛାତି ।
ଭୁଲାଇ ସବୁ ମାନ ଅଭିମାନ
କୋଳାଗ୍ରତ କରିନିଏ,
ପ୍ରଜ୍ୱଳିତ କରେ ହୃଦୟେ ସ୍ନେହ
ପର୍ବର ମାହାତ୍ମ୍ୟ ଇଏ ।
ସଭିଙ୍କୁ କୋଳାଇ ଆପଣାର କରି
ବଞ୍ଚିବା ଜୀବନ ରେଖା
ନିଜେ ଜଳି ଅନ୍ୟକୁ ଆଲୋକ ବାଣ୍ଟିବା
ଶିକ୍ଷା ଦିଏ “ଦୀପ ଶିଖା” ।
ଆମ ସଂସ୍କୃତି ଆମ ପରମ୍ପରା
ଜୀବନର ଜ୍ୟୋତି ରେଖା ।
ଦୀପାବଳି ଜାଳି ସବୁ କଷ୍ଟ
ଢାଳିଦେଉ ସ୍ନେହ, ସୁରକ୍ଷା ।
ଶୁଭ ଦୀପାବଳି ।
– ସୁଶ୍ରୀ ସଙ୍ଗୀତା ସେଠୀ
Comments
ସୁଶ୍ରୀ ସଙ୍ଗୀତା ସେଠୀ
ସୁଶ୍ରୀ ସଙ୍ଗୀତା ସେଠୀ ଓଡ଼ିଆ ଭାଷାରେ ବିଭନ୍ନ ପ୍ରକାରର ଗପ ଓ କବିତା ଆଦି ରଚନା କରିଥାନ୍ତି । ତାଙ୍କ ରଚିତ ପ୍ରସଙ୍ଗଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇଛି ।
