ବାରବୁଲାଟିଏ ମୁଁ…
କ୍ଷଣସ୍ଥାୟୀ ମୋର ରହଣୀ
ଆଜି ଏଠି ତ କାଲି ସେଠି ପୁଣି,
ନା ଅଛି ଅତୀତର କ୍ଷୋଭ
ନା ଅଛି ଆଗତ ଭବିଷ୍ୟତର ଚିନ୍ତା,
ମୁଁ କେବଳ ବର୍ତ୍ତମାନରେ ଭାବ ବିହ୍ୱଳ ।
ନା ଅଛି ଆଶ୍ରୟ
ନା କେହି ଆଶ୍ରୟ ଦାତା
ମୁଁ ମୋ ଭାଗ୍ୟର ଭାଗ୍ୟ ବିଧାତା
ବୈଶାଖର ଝାଞ୍ଜି ହେଉ,
ହେଉ ଅବା ଆଷାଢ଼ର ମୂଷଳଧାରା
ପୁଣି ଶୀତର ଚାଦର ତଳେ
କିମ୍ଭୁତକିମାକାର ମୋ ଜୀବନ
ସ୍ୱପ୍ନ ଆଉ ବାସ୍ତବତାର ଅପୂର୍ବ ମିଳନ ।
ପ୍ରତିକ୍ରିୟାହୀନ ଜୀବନ
ବୁଝିପାରେନି ମୁଁ
ମୋ ପାଇଁ ଦୁଃଖ ଆଉ ସୁଖର
ପରିଭାଷା କ’ଣ !
ସ୍ୱପ୍ନ ତ ଅମାପ..
କିନ୍ତୁ ସ୍ୱପ୍ନ ସବୁ
ଆବେଗହୀନ
ପ୍ରତିଶ୍ରୁତିହୀନ
ମାୟା ମରୀଚିକା ସମାନ,
କଣ୍ଟକିତ ବାସ୍ତବତାରେ ବି
ମୁଁ ଖୋଜିବସେ ଶତାବ୍ଦୀର ଆହ୍ୱାନ…
– ସନ୍ଧ୍ୟାରଣୀ ଦାଶ
Comments
ସନ୍ଧ୍ୟାରଣୀ ଦାଶ
ସନ୍ଧ୍ୟାରଣୀ ଦାଶ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
