ବାପା ତୁମେ
ମୋ ଜୀବନ ଜଞ୍ଜାଳର
ଉଦୁଉଦିଆ ଖରାରେ
ଗାଁ ମୁଣ୍ଡ ଝଙ୍କାଳିଆ ବରଗଛ ଛାଇ ।
ଥକ୍କାକୁ ଧକ୍କା ମାରିବାର
ତୁମେ ତ ସାହାସ
ଆତ୍ମବିଶ୍ୱାସରେ ଅସ୍ତିତ୍ଵହରା
ଆଶା ଆଶଙ୍କାର
ମୋ ଶୁଷ୍କ ମରୁଭୂମିରେ
ତୁମେ ମୋ ବିଶ୍ୱାସ ଭରସାର
କୁଳୁକୁଳୁ ପ୍ରବାହିତ ଚିରସ୍ରୋତା ନଈ ॥
ଆକାଶର ପରିସୀମାକୁ
ସୀମିତ କରି
ତୁମଛଡ଼ା କିଏ ଦେଇପାରିବ
ସୁରକ୍ଷିତ ଆଶ୍ରୟର
ବିଶାଳ ଛାତଟେ??
ଶୃଙ୍ଖଳା ଆକଟରେ
ତୁମେ ଭୟଙ୍କର ଅଶାନ୍ତ ଲହଡ଼ି ।
ହେଲେ ଗଭୀର ହୃଦୟରେ
ଥାଏ ତୁମ ସ୍ନେହ ପ୍ରେମର
ଧୀର, ସ୍ଥିର,ଶାନ୍ତ,ସୁନୀଳ ଜଳରାଶି ।
ତୁମେତ ଦୀପଶିଖା ଟିଏ,
ଜଳୁଥାଅ ଅହରହ
ମୋ ଅଜ୍ଞାନ ଅନ୍ଧକାରକୁ
ଆଲୋକିତ କରି ।
ମୋ ମଥାରେ ତୁମ ହାତ ଥିଲେ
ମୋ ଦୁର୍ବଳ ମନରେ
କେମିତି କେଜାଣି ଭରିଯାଏ
ଶତ ସିଂହର ଶକ୍ତି ।
ତୁମେ ଅଛ ବୋଲି
ମୁଁ ଆଜିଯାଏ ହାରିନାହିଁ
ଏବେ ବି ଅପରାଜେୟ ।
ବାପା ତୁମେ, ମୋ ପାଇଁ
ସୃଷ୍ଟିର ଶ୍ରେଷ୍ଠ ଆଶୀର୍ବାଦ ।
Comments
କାର୍ତ୍ତିକେଶ୍ଵର ସାହୁ
କାର୍ତ୍ତିକେଶ୍ଵର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
