ଆମ ସଂସ୍କୃତିରେ ଅକ୍ଷୟ ତୃତୀୟା
ଏକ ମହାନ ପରବ
କୃଷି ଭିତ୍ତିକ ଓ ଧାର୍ମିକ ପର୍ବ ସେ
ଗଣା ଶ୍ରେଷ୍ଠ ପର୍ବ ଭାବ ॥
ବୌଶାଖ ଶୁକ୍ଳ ପକ୍ଷ ତୃତୀୟାରେ
ଏହି ପର୍ବଟି ପାଳିତ
ସତ୍ୟ ଯୁଗର ପ୍ରଥମ ଦିବସ
ବୋଲି ରହିଚି କଥିତ ॥
ଅକ୍ଷୟ ତୃତୀୟା ଦିନଠୁ ଶ୍ରୀକ୍ଷେତ୍ରେ
ଚନ୍ଦନ ଯାତରା ହୁଏ
ମହାପ୍ରଭୁ ଜଗନ୍ନାଥଙ୍କର ରଥ
ନିର୍ମାଣ ଆରମ୍ଭ ହୁଏ ॥
ଏହି ଦିନଟିରେ କୃଷକ ଭାଇ ଯେ
କରେ ମୁଠି ଅନୁକୂଳ
ପାହାନ୍ତ ପହରୁ ଶେଯରୁ ଉଠି ସେ
ନିତ୍ୟକର୍ମ ସାରେ ଚଞ୍ଚଳ ॥
ବିହନର ପୂର୍ଣ୍ଣ ନୂଆ ଗଉଣିକୁ
ମୁଣ୍ଡରେ ମୁଣ୍ଡେଇ ଥାଏ
ହଳ ଲଙ୍ଗଳକୁ ଧରି ଚଷାଭାଇ
ନିଜର କ୍ଷେତକୁ ଯାଏ ॥
ଲକ୍ଷ୍ମୀ ମାତାଙ୍କୁ ସେ ସ୍ମରଣ କରିକି
କ୍ଷେତେ ଲଙ୍ଗଳ ବୁଲାଏ
ମୁଠା ମୁଠା କରି ବିହନ ଗୁଡ଼ିକୁ
କିଆରିରେ ବୁଣି ଦିଏ ॥
ଅଧିକ ଫସଳ ଅମଳ ଆଶାରେ
କରେ ମୁଠି ଅନୁକୂଳ
ଅକ୍ଷୟ ତୃତୀୟା ଅମୃତ ବେଳାରେ
କାର୍ଯ୍ୟରେ ମିଳେ ସଫଳ ॥
ଆମ ସଂସ୍କୃତିରେ ଅକ୍ଷୟ ତୃତୀୟା
ଏକ ଶୁଚିମନ୍ତ ପ୍ରତୀକ
ପ୍ରେରଣା ଦାୟକ ଆମ ପରମ୍ପରା
ପାଳିତ ପର୍ବ ଗୁଡ଼ିକ ॥
– ମମତା ସାହୁ
Comments
ମମତା ସାହୁ
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
