ଆଶ୍ୱିନେ ଆସୁ ତୁ ପଣତ ମେଲେଇ
ବସୁନ୍ଧରା ସଜାଏ କାଶତଣ୍ଡୀ ତୋ’
ଚଲାପଥେ ଭବ୍ୟ ସ୍ୱାଗତ ପାଇଁ
ଆଶ୍ୱିନ ଡାକେ ମା’ ମା’ ଗୁହାରି
ଶୁଣିମା ହେଉ ବେଗି ହର ଚିତ୍ତ
ଭକ୍ତ ମାତି ଉଠେ ତୋ’ ନାମ ଆବୋରି ।
ଜଗତ ହୁରି ପକାଏ ସଜାଅରେ ବେଗି
ମା’ ପୂଜା ପୀଠ ମା’ ପରା ବିରାଜିବ
ନାଶିବାକୁ ଜଗତରୁ ଅନ୍ଧାର ପ୍ରହରୀ
ଘଣ୍ଟ, ମୃଦଙ୍ଗର କର ବେଗେ ସଜ
ମା’କୁ ପରା ପାଛୋଟିବା ଏ ଧରାକୁ
ହୁଳହୁଳିରେ ତୋଷି ତା’ ମନକୁ ହରି ।
ଏ ପାର୍ବଣର ଋତୁ ଚାତକ ପରା
ମା’ ଦରଶନ ପାଇଁ ମରତେ
ବ୍ୟଗ୍ର ଚାନ୍ଦ ଆଉ ଚକୋରି
ଶରତ ସଜାଏ ତୋଫା ଆକାଶ
ହାଲକା ଶିଶିର ଚାଦର ଘୋଡ଼େଇ
ସଭିଏଁ ବ୍ୟସ୍ତ ମା’ ମନକୁ ନେବାକୁ ମୋହି ।
ଗାଁ ଦାଣ୍ଡ, ସଞ୍ଜ, ଚଉଁରା ତୁଳସୀଙ୍କ
ପାଦ ନଲାଗେ ଆଉ ଭୂଇଁରେ
ସତେ ମିଳିଛି କୋଟିନିଧି,
ପବନ ମିଶାଇ ପରବର ବାସ୍ନା
ଦେଉଛି ବୋଳି ଧରଣୀ ଦେହେ
ଦଶଦିଶ ମା’ ନାମ ବାସିବ ଭେଦି ।
ସବୁରି ପ୍ରାଣରେ ଫୁଟି ଉଠେ ପାର୍ବଣର
ମହକ ମା’ ଆସିଛି ଏ ଶରତେ ଅଶିଣକୁ
ତା’ ପଣତ ସ୍ପର୍ଶରେ ଧନ୍ୟ କରି
ଝୁଣା , ଧୂପଦୀପ, ଘଣ୍ଟ, ଶଙ୍ଖ ନାଦେ
ଦଶଦିଶ ପଡ଼େ ଉଛୁଳି ଭକ୍ତ ବିଭୋର
ମା’ ର ଚରଣ ସେବା କରି ।
ଏମିତି ଯୁଗେ ଯୁଗେ ଆସୁଥାଅ ମା’
ଭକତ କରେ ବିନତି ଆବେଗଭରା
କଣ୍ଠେ ଆଖିରେ ଲୋତକ ଭରି
ପାବନ ହେଉ ଏ ମାଟି ଝୁମୁ ଏ
ପାଣିପବନ, ସକଳ ପ୍ରାଣୀର ତୁମ
ଆଗମନେ ଯାଉ ସବୁ ଦୁଃଖ ସରି।
ପବିତ୍ର ଦଶହରାର ଅନେକ ଶୁଭେଚ୍ଛା ଓ ଅଭିନନ୍ଦନ ।
ଜୟ ମା ଦୁର୍ଗା ।
– ସୁଶ୍ରୀ ସଙ୍ଗୀତା ସେଠୀ
Comments
ସୁଶ୍ରୀ ସଙ୍ଗୀତା ସେଠୀ ଓଡ଼ିଆ ଭାଷାରେ ବିଭନ୍ନ ପ୍ରକାରର ଗପ ଓ କବିତା ଆଦି ରଚନା କରିଥାନ୍ତି । ତାଙ୍କ ରଚିତ ପ୍ରସଙ୍ଗଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇଛି ।
