ତତେ ଦେଖିବାକୁ କିଛି ଆଧାର
କି ଲୋଡ଼ା,
ତତେ ପାଖରେ ପାଇବାକୁ
କିଛି ମାଧ୍ୟମର କି ଲୋଡ଼ା,
ତୋତେ ଅନୁଭବ କରିବାକୁ
ତୋ ଛୁଆଁର କି ଲୋଡ଼ା,
ତୁ ତ ଅଛୁ ମୋ ଭିତରେ…
ମୋ ସତ୍ତାର ପ୍ରତ୍ୟେକ ବିନ୍ଦୁରେ
କେବଳ ତୋର ହିଁ ତ ଅସ୍ତିତ୍ୱ,
ପ୍ରତିଟି ଆବେଗ ସହ ବନ୍ଧା
କେବଳ ତୁ ହିଁ ତ ତୁ,
ପ୍ରତିଟି ପ୍ରଶ୍ୱାସ ସହିତ
ତୁ ହିଁ ତ ନିଜକୁ ଜାହିର କରିଚାଲିଛୁ,
ମୋ ହୃଦୟରେ…
ତା’ହେଲେ,
ତୋ ଓ ମୋ ଭିତରେ ଯେ
ଯୋଜନ ଯୋଜନର ଦୂରତା,
ଏ ପ୍ରଶ୍ନ କାହିଁକି?
ଯେତେବେଳେ
ଏକଥା ନା ତୋ ମନ ମାନୁଛି
ନା ମୋ ମନ… !!!!!
– ଇତିଶ୍ରୀ ନାୟକ
Comments
ଇତିଶ୍ରୀ ନାୟକ ପେଶାରେ ଜଣେ ଦୂରଦର୍ଶନ ସମ୍ୱାଦ ଉପସ୍ଥାପିକା, ଯିଏକି ଏବେ ନ୍ୟୁଜ୍ 7ରେ କାର୍ଯ୍ୟରତ । ପୂର୍ବରୁ ସେ ଇ-ଟିଭି ଓଡ଼ିଆ ଓ MBC TV ଭଳି ଚେନାଲ୍ରେ କାର୍ଯ୍ୟ କରୁଥିଲେ । ସେ ତାଙ୍କର ଫାଙ୍କା ସମୟରେ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
