ଦେଶର ଆର୍ଥିକ ସ୍ଥିତିର ମୂଳଦୁଆ
ଅଟଇ ଶ୍ରମିକ ଭାଇ,
ତା’ ପାଇଁ ହୁଅଇ ଦେଶର ଉନ୍ନତି
ତା’ ପରି ଆଉ କେ ନାହିଁ ।
କେହିତ ବୁଝେନା ତାହାରି ବେଦନା
ଆମୋଦେ ଥାଇ ପାଗଳ,
ଜଗତ କଲ୍ୟାଣ କରିବା ପାଇଁ ସେ
ବୁହାଏ କେତେ ଯେ ଝାଳ ।
ନିଜ ପାଇଁ ତା’ର ନଥାଏ ନଜର
କର୍ମ ତା’ର କରିଚାଲେ,
ନୀରବେ ଗୋପନେ ଝରାଏ ସେ ଲୁହ
କେବେ କେବେ କଷ୍ଟ ହେଲେ ।
ଲହୁ ଲୁହ ନିଗାଡ଼ି ଖଟି ସେ ଚାଲେ
ଆମ ସୁଖ ପାଇଁ ଖାଲି,
ପାରିଶ୍ରମିକ ତା’ର ମିଛେ ସେ ନିଏ
ପେଟ ତା’ ପୋଷିବ ବୋଲି ।
ନିୟତ ଲାଞ୍ଛିତ କାଳେ ପ୍ରତାରିତ
ନାହିଁଟି ତା’ର କଳନା,
ସବୁରି ବେଦନା ଦୂର କରିସାରି
ଲୋଡ଼େ ସେ ଟିକେ ସାନ୍ତ୍ୱନା ।
ତା’ ପାଇଁ ଧରାଟି ହୁଅଇ ସରଗ
ନିର୍ଜୀବ ପାଏ ଜୀବନ,
ଶୋଷଣ କଷଣ ଯାତନାର ବେଢ଼ି
ଭାଙ୍ଗିଦିଏ ତା’ର ମନ ।
ଆମକୁ ସୁଖରେ ରଖିବା ପାଇଁ ସେ
ସହୁଅଛି କେତେ କଷ୍ଟ,
ଆଜିର ଦିନରେ ନେବାରେ ଶପଥ
କରିବାନି ତା’ର ଅନିଷ୍ଟ ।
– ରାଜେଶ୍ୱରୀ ପଣ୍ଡା
Comments
ରାଜେଶ୍ୱରୀ ପଣ୍ଡା
ରାଜେଶ୍ୱରୀ ପଣ୍ଡା ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
