ଆସହେ ଭକତ ଚକା ନୟନକୁ
ରଥରେ ଦର୍ଶନ କରିବା
ଜୀବନର ଯେତେ ଦୁଃଖ ଯାତନାକୁ
ହସି ହସି ଭୁଲିଯିବା ॥
ପରବ୍ରହ୍ମ ସେ ଯେ ଚତୁର୍ଦ୍ଧା ମୁରତି
ଭକତ ବତ୍ସଳ ହରି
ଭାବର ଠାକୁର ନିଳାଦ୍ରୀ ବିହାରି
ଦୟାମୟ ଦଇତାରି ॥
ମନ କିଣିନିଏ ବାଙ୍କ ଚାହାଣିରେ
ଅଧା ନାଲିହସ ତା’ର
ଲାବଣ୍ୟ ସମ୍ଭାର ଅପରୁପ ଶୋଭା
ଦିଶେ କେଡ଼େ ମନୋହର ॥
ଆଷାଢ଼ର ଶୁକ୍ଲ ଦ୍ୱିତୀୟା ତିଥିରେ
ଯିବେ ଶ୍ରୀଗୁଣ୍ଡିଚା ଘର
ଭାଇ ଭଗିନି ତିନି ନଅ ଦିନ ରହି
ବାହୁଡ଼ିବେ ଶ୍ରୀ ମନ୍ଦିର ॥
ଭକତ ଭିଡ଼ରେ ରଥଯାତ୍ରା ଦିନ
ଶ୍ରୀ ବଡ଼ଦାଣ୍ଡକୁ ଯିବା
ରଥର ଦଉଡ଼ି ଭକତିରେ ଭିଡ଼ି
ନିଜ ହସ୍ତେ ଟାଣୁ ଥିବା ॥
ଅପବିତ୍ର ନେତ୍ର ପବିତ୍ର କରିବା
ଦର୍ଶନ କରି ଶ୍ରୀମୁଖ
ମଣିଷ ଜନମ ସାର୍ଥକ କରିବା
ପାଇବା ସରଗ ସୁଖ ॥
ଆହେ ମହାବାହୁ ଶ୍ରୀ ପୁରୁଷୋତ୍ତୋମ
ଏତିକି ସୁଦୟା ହେଉ
ମରିବା ଆଗରୁ ଶ୍ରୀ ମୁଖ ଦର୍ଶନ
ମୋ ଭାଗ୍ୟରେ ଲେଖା ହେଉ ॥
ଲୋଡ଼ା ନାହିଁ ପ୍ରଭୁ ଧନମାନ କିଛି
ଲଭିଲେ ପ୍ରଭୁ ଦର୍ଶନ
ଗାଇ ପ୍ରଭୁନାମ ବିତିଯାଉ ଦିନ
ଧନ୍ୟ ହେବ ଏ ଜୀବନ ॥
– ମମତା ସାହୁ
Comments
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
