ଧବଳ ଆକାଶ ଶ୍ୱେତ କାଶତଣ୍ଡୀ
ସ୍ୱଚ୍ଛ ନିର୍ମଳ ଶରତେ,
ଦୁର୍ଗତିନାଶିନୀ, ମହିଷାମର୍ଦ୍ଦିନୀ
ମା’ ଧରାକୁ ପାଦ ଥାପେ !
କାଶତଣ୍ଡୀ ସଜାଇ ତା’ ବାଟ ଗାଏ
ଆସ ମାଏ ଆସ ବେଗେ,
ଏ ଧରା, ଗଗନ ପ୍ରକମ୍ପିତ ହେଉ
ତୁମ ଜୟକାର ନାଦେ !
ଶଙ୍ଖ, ଘଣ୍ଟ ଧ୍ୱନି, ଅଗୁର, କର୍ପୂରେ
ଶୁଦ୍ଧ ହେଉ ଏ ସଂସାର,
ନାଶ ହେଉ ସବୁ ନକାରାତ୍ମକ ଶକ୍ତି
ଭରିଯାଉ ଆଶିଷେ ଅଗଣା, ଘର !
ମୁଖରିତ ହେଉ ଗାଁ ଦାଣ୍ଡ ଉତ୍ସବେ ମାତି
କୋଳାହଳ ଭରୁ ତୋ’ ଆଗମନେ,
ସବୁରି ମନରେ ଉଲ୍ଲାସ, ଉତ୍କଣ୍ଠା
ଭରି ଗାଉ, ନାଚୁ ଭକ୍ତ ମଗନେ ।
ଆସିଛୁ ମା’ ଗୋ ଧରାକୁ ଓହ୍ଲେଇ
ନମସ୍ତେ ନମସ୍ତେ ମା’ ଦୁର୍ଗା,
ଦଶଦିଶ ଆଜି କମ୍ପେ ତୋ’ର ଗୁଣ
ଗାନ କରି ହେ ଜଗତମାତା !
ଧନ୍ୟ ହେଲା ଏ ମାଟି, ଏ ପବନ
ତୋ’ ଚରଣ ସ୍ପର୍ଶ ପାଇ,
ତୁ ମା ପାବନୀ ତୋ’ ଆଶିଷ ଲୋଡ଼େ
ତୋ’ ମହିମା ଗାଇ ଗାଇ !
ଏ ସୃଷ୍ଟି ଥିବା ଯାଏଁ ତୋ’ର ଏ ପରବ
ସାଜୁଥାଉ ଏ ମାଟିରେ,
ଏତିକି ମାଗୁଣି ତୋ’ ଚରଣରେ ମା’
ଆସୁଥା ସବୁ ଅଶିଣରେ।
ଦଶହରାର ଅନେକ ଶୁଭେଚ୍ଛା ଓ ଅଭିନନ୍ଦନ ଆପଣଙ୍କୁ ! ମା ଦୁର୍ଗା ତାଙ୍କ କୃପାଦୃଷ୍ଟି ଆପଣଙ୍କ ଉପରେ ରଖନ୍ତୁ, ଆପଣଙ୍କ ଜୀବନ ସୁଖମୟ ହେଉ ମା’ଙ୍କ ଆଶିଷ ରୁ ! ମା ଦୁର୍ଗତିନାଶିନୀ ପାପ, ଅଧର୍ମର ନାଶକରି ଧର୍ମର ସ୍ଥାପନା କରନ୍ତୁ ।
– ସୁଶ୍ରୀ ସଙ୍ଗୀତା ସେଠୀ
Comments
ସୁଶ୍ରୀ ସଙ୍ଗୀତା ସେଠୀ
ସୁଶ୍ରୀ ସଙ୍ଗୀତା ସେଠୀ ଓଡ଼ିଆ ଭାଷାରେ ବିଭନ୍ନ ପ୍ରକାରର ଗପ ଓ କବିତା ଆଦି ରଚନା କରିଥାନ୍ତି । ତାଙ୍କ ରଚିତ ପ୍ରସଙ୍ଗଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇଛି ।
