ଖୋଜେ ମୁଁ ତୁମକୁ
ତୁମ ହାତରେ ହାତ ଛନ୍ଦିବାକୁ
ପାଦରେ ପାଦ ମିଶେଇ ଚାଲିବାକୁ
କହିବା ପୂର୍ବରୁ କଷ୍ଟ ଜାଣିବାକୁ ।
ଖୋଜେ ମୁଁ ତୁମକୁ
ମୋ ଅର୍ଥହୀନ କଥାରେ ହସିବାକୁ
ଦୁଃଖକୁ ମୋର ଅନୁଭବ କରିବାକୁ
ଆଖି ଦେଖି ମନ କଥା ପଢ଼ିବାକୁ ।
ଖୋଜେ ମୁଁ ତୁମକୁ
ରାଗିବା ପର୍ଯ୍ୟନ୍ତ ରଗେଇବାକୁ
ଟିକିଏ ଖୁସିରେ ମନେ ପକେଇବାକୁ
ନିଷ୍ପତ୍ତି ନେବା ଆଗରୁ ପଚାରିବାକୁ ।
ଖୋଜେ ମୁଁ ତୁମକୁ
ସବୁ କଥାରେ ମୋ ସହ ଯୁକ୍ତି କରିବାକୁ
ଟିକେ ପରେ ଟିକେ ବାସ୍ ରାଗିବାକୁ
ବାରମ୍ବାର ଚାଲିଯିବି କହି ଡରେଇବାକୁ ।
ଖୋଜେ ମୁଁ ତୁମକୁ
ଅଜବ ଧରଣର ନାଁ’ରେ ଡାକିବାକୁ
ନ ହସିବା ପର୍ଯ୍ୟନ୍ତ ଚିଡ଼େଇବାକୁ
ଅଭୁଲା ସ୍ମୃତିକୁ ମନେ ପକେଇବାକୁ ।
ଖୋଜେ ମୁଁ ତୁମକୁ
ସାମାନ୍ୟ କଥାରେ ବି ରାଣ ମାଗିବାକୁ
ଛୋଟ ଛୋଟ ଭୁଲ ମୋର ଲୁଚେଇବାକୁ
ରଗେଇ ସାରିଲା ପରେ ପୁଣି ମନେଇବାକୁ ।
ଖୋଜେ ମୁଁ ତୁମକୁ
ଲୁଚି ଲୁଚି ଭଲରେ ଟିକେ ଦେଖିବାକୁ
ସବୁ ଜାଣି ଅଜଣା ହେଇ ମଜା ନେବାକୁ
ବେଳେବେଳେ ତୁମର ଟିକେ ନକଲ କରିବାକୁ ।
ଖୋଜେ ମୁଁ ତୁମକୁ
ଦିନରାତି ତୁମ ସହିତ ଗପିବାକୁ
ରାତି ଅଧରେ ମିଛ କହି ଉଠେଇବାକୁ
ବାସ୍ ମୋତେ ହିଁ ମୋତେ ଭଲ ପାଇବାକୁ ॥
– ବସୁମତୀ ସାହୁ
Comments
ବସୁମତୀ ସାହୁ
ବସୁମତୀ ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
