କବି କହେ କବିତାକୁ
କିପରି କହିବି ମନର କଥା,
କବିତା କହେ କବିରେ
ମୁଁ ପରା ତୋ ମନର ବ୍ୟଥା ।
କବିତାରେ ଲେଖୁଛୁ ତୁ
ତୋ ମନର ଅକୁହା କଥା,
ଜାଣିପାରୁ ନାହୁଁ କବିରେ
ଇଏ ପରା ତୋ’ ହୃଦୟର ବାର୍ତ୍ତା ।
କବି କହେ କବିତାରେ
ପ୍ରକୃତ ବନ୍ଧୁ ଯେ ତୁ ମୋର,
ତୋରି କୋଳେ ଖୋଲିଦିଏ
ଅକୁହା କଥାର ଗନ୍ତାଘର ।
କବିତା କହେ କବିରେ
ମୁଁ ପରା ଅଛି ତୋ’ ସାଥିରେ,
ସ୍ନେହମୟୀ ମା’ ପରି ମୁଁ ଥିବି
ତୋ’ ସହ ସବୁ ସ୍ଥିତିରେ ।
କବିତାର ପ୍ରତ୍ୟେକ ପଂକ୍ତିର
ଜୀବନ ଅନୁଭୂତି ମୋ ଲେଖାରେ,
ଲୁହର ଧାରା ଯେ ବହିଯାଏ
ମୋର ଅସରନ୍ତି ଲେଖନୀର ।
ଜୀବନର ପ୍ରତିଟି ଘଡ଼ିସନ୍ଧିରେ
ବିତୁଛି ଦିନ ଯେ ଯନ୍ତ୍ରଣାରେ,
ଯନ୍ତ୍ରଣା ଲାଘବ କରେ ଆଂଶିକ
କବିତାର ପ୍ରତିଟି ଧାଡ଼ିରେ ।
ଲୁହର ବନ୍ୟାରେ ଭିଜୁଛି
ଭିଜୁଛି କାଗଜ ପୃଷ୍ଠାରେ
ଭିଜି ଭିଜି ଛାପି ଯାଏ
କବିତାର ସେ ଗଭୀରତାରେ ।
କବିର ସାଥୀ କବିତା ସାଜିଛି
ଜୀବନ ଜିଇଁବା ପାଇଁ
ସାଥୀ ହୋଇ ବାଟ ଚାଲିଥା’ନ୍ତି
ଧୋକା କେହି ଦିଏ ନାହିଁ।
– ରଶ୍ମୀବାଳା ଶତପଥୀ
Comments
ରଶ୍ମୀ ବାଳା ଶତପଥୀ
ରଶ୍ମୀ ବାଳା ଶତପଥୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ, କବିତ ଆଦି ରଚନା କରିଥାନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
