ବିଶ୍ୱ ପ୍ରସିଦ୍ଧ ରଥଯାତ୍ରା ଆଜି
ଉତ୍କଳେ ପାଳିତ ହୁଏ
ଉତ୍ସବ ମୁଖର ଚଳ ଚଞ୍ଚଳିତ
ବଡ଼ଦାଣ୍ଡ ହୋଇଥାଏ ॥
ଆଷାଢ଼ ଶୁକଳ ଦ୍ୱତୀୟା ତିଥିରେ
ପବିତ୍ର ଏ ରଥଯାତ୍ରା
ରଥରେ ଦର୍ଶନ ଦେବେ ପରବ୍ରହ୍ମ
ଦୀନବନ୍ଧୁ ବିଶ୍ୱକର୍ତ୍ତା ॥
ରତ୍ନ ସିଂଘାସନ ଛାଡ଼ି ଜଗନ୍ନାଥ
ଭକତ ମେଳରେ ରହି
ଟାହିଆ ହଲାଇ ମନ୍ଦ ମନ୍ଦ ହସି
ନିଏ ଭକ୍ତ ମନ ମୋହି ॥
ଦିବ୍ୟ ଚେତନାର ଭକତି ଆବୋରି
ଭକତଟି ଆସି ଥାଏ
ଚତୁର୍ଦ୍ଧା ମୁରତି କରିକି ଦର୍ଶନ
କୋଟି ପୁଣ୍ୟ ଲଭିଥାଏ ॥
ତିନି ଗୋଟି ରଥ ଦାଣ୍ଡେ ଶୋଭାପାଏ
ଶୁଭେ ଶୁଭ ଶଙ୍ଖ ଧ୍ୱନି
ଆଳଟ ଚାମର ଭଜନ କୀର୍ତ୍ତନ
ଘଣ୍ଟ ଘଣ୍ଟି ବାଜେ ପୁଣି ॥
ତାଳଧ୍ୱଜ ରଥେ ବଳିଆ ଠାକୁର
ସୁଭଦ୍ରା ଦର୍ପଦଳନେ
ନନ୍ଦିଘୋଷ ରଥେ କାଳିଆ ଠାକୁର
ବିରାଜି କେଡ଼େ ଯତନେ ॥
ଭକ୍ତ ପାଇଁ ପ୍ରଭୁ ଘୋଷଯାତ୍ରା କରି
ବାହାରି ବଡ଼ଦାଣ୍ଡରେ
ଭକ୍ତ ଭଗବାନ ମିଳନ ଏମିତି
ଖ୍ୟାତି ଅଛି ସଂସାରରେ ॥
ରଥର ଦଉଡ଼ି ଭିଡ଼ି ହସ୍ତ ଧରି
ଟାଣନ୍ତି କୋଟି ଭକତ
ଦେଖିଦେଲେ ତାହା ଆଖି ଲାଖିଯାଏ
ବରଷେ ଭକ୍ତି ଅମୃତ ॥
ବାର ମାସେ ତେର ଲୀଳା କଲବୋଲି
ପବିତ୍ର ଉତ୍କଳ ମାଟି
ସାରାବିଶ୍ୱ ଦେଖେ ରଥଯାତ୍ରା ତୁମ
ଗର୍ବିତ ଓଡ଼ିଆ ଜାତି ॥
– ମମତା ସାହୁ
Comments
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
