ଘରୁ ବାହାରିଲେ ଦେଖ୍ସୁଁ ପଡ଼ିଛେ
କେତ୍ନିକେତେ ବାଟ୍
ଉସାର୍ ସାଁକୁର୍ ଖାଲ୍ ଢିପ୍ ଭରା
ବଁକା ଆଉର୍ ଛାଟ୍
ବାଟ୍ ସବୁ ଫେର୍ ଯୁଡ଼ାଯୁଡ଼ି ହେଇ
ବନିଛେ ବାଟର୍ ଜାଲ୍
ଯେନ୍ ଆଡ଼୍କେ ଘିଚିହେସି ପାଦ୍
ସେହି ବାଟ୍ ମାଡ଼ି ଚାଲ୍
ବାଟ୍ ଦୁହି ତରେଁ ଘର୍ ଦୁକାନ୍
ବସିଛେ ବଡ଼୍କା ହାଟ୍
ଯେନ୍ ବାଟେ ଥିସି ଗଛର୍ ଗୁହୁଡ଼ି
ଗୁଟେକେ ବି ନାଇଁ କାଟ୍
କାହିଁ ବି ଯିବାର୍ ନାଇଁଥିଲେ ମିଶେ
ବାଟ୍କେ ଆଏସୁଁ ଚାଲି
ସମିଆ ସବୁକେ ଗୁଏଢ଼ଇଁ ଦେସୁଁ
ଇଠାନ୍ ସେଠାନ୍ ବୁଲି
ଗୁଟେ ଠାନେ ଯେ ଥାବେ ରହେସି
କର୍ସି ନିଜର୍ କାମ୍
ତାକେ ମିଲ୍ସି ସୁଖ୍ ସଂତୋଷ୍
କେଭେଁ କେନ୍ତା ଦାମ୍
ଲଟ୍କିଲା ଲୋକ୍ ଭଟ୍କେ ନାଇଁ
ରହିଥିସି ଘର୍ ଜଗି
ବାଟେଁ ଚାଲିଚାଲି ଘର୍ ଘର୍ ବୁଲି
ନାଇଁଯାଏ କିଛି ମାଗି
ଚତୁର୍ଧାମ୍ ବୁଲି କିଛି ନାଇଁମିଲେ
ଘର୍କେ ପଂଚମ୍ ଧାମ୍
ବନେଇ ପାର୍ଲେ ମୁନୁଷ୍ ପାଏସି
ଗୁର୍ଦୁଟେ ସୁନାମ୍