ବରଷ ବଦଳିଯାଏ
ବରଷ ବଦଳିଯାଏ

ବରଷ ବଦଳିଯାଏ

ବର୍ଷ କେତେ ଆସିଲେ,
କେତେ ଗଲେ,
କିଛି ତା’ର ହିସାବ ମିଳେନା,
ପ୍ରତିବର୍ଷ ବୈଶାଖ ଆସିଲା,
ବର୍ଷା ଆଉ ତା’ପଛେ ପଛେ ବସନ୍ତ ବି
କାଳେ ଭୂଲିଯିବି,
ଲେଖିନେଲି ସବୁକିଛି ସ୍ମୃତି ଡାରିରୀରେ,
ବହୁତ ଜରୁରୀ ଘଟଣା ସବୁ ଟିପିନେଲି,
ଆଉ ମାମୁଲି ଘଟଣା ଯେତେ
ଏଇମିତି ଭୂଲିଗଲି ।
କିନ୍ତୁ ବର୍ଷ ଶେଷେ,
ପୁରୁଣା ଡାଇରୀ ଯେତେ ସବୁ ହଜିଯାଏ
ମୋଟା ମୋଟି କଥା,
ପୁରୁଣା ଦିନମାନଙ୍କର ହିସାବ ମିଳେନା
ନୂଆଦିନ ନୂଆବର୍ଷ ମନ କିଣିନିଏ ।
ସଂସାର ବି ବିଚିତ୍ର ବହୁତ,
ଜଣାପଡ଼େନି କେବେ ଆପଣାର ଲୋକ
ପର ହୋଇଯାଏ,
ପୁଣି ପର କେବେ ଆପଣାର ହୋଇ,
ମୁଣ୍ଡର ବୋଝକୁ ହାଲୁକା କରିଦିଏ ।
କେବେ ନା’କେହି ନିଜରଥାଏ
ନା’କେହି ପର,
ମନେହୁଏ,କେଉଁ ଏକ ପରଦେଶେ,
ହାଟ ମଝିରେ ମୁଁ ଏକାକୀ ବେପାରୀ
ଲୋକ ଗହଳିରେ ଏକା ହନ୍ତସନ୍ତ ହୁଏ ।
ଏଇ ତ ଜୀବନ,
ଏଇମିତି ଗଡ଼ି ଚାଲିଯାଏ,
ବର୍ଷ ଆସେ ବର୍ଷ ଯାଏ,
ନୂଆ ପୁରୁଣା ହୁଏ
କାନ୍ଥର କ୍ୟାଲେଣ୍ଡର ବଦଳି ଯାଏ,
ବୟସରେ ବର୍ଷ ଯୋଡ଼ିଯାଏ ।
ହିସାବ ରହେନା,
କେତେ ଦେଲି କେତେ ନେଲି
ଜୀବନର ହିସାବଖାତା ତଥାପି ସେମିତି
ସବୁଦିନ ଶୂନ୍ୟ ରହିଯାଏ ।

Comments

comments

ଅନ୍ୟମାନଙ୍କ ସହ ସେୟାର କରନ୍ତୁ...

Leave a Reply

Close Menu