ବରଷକେ ଥରେ ଆସିଛି ରଜ,
ଆଣିଛି ତା’ ସାଥେ କେତେ ମଉଜ ।
ନୂଆ ଆଷାଢ଼ ମୌସୁମୀ ଆଜି,
କହିଦିଏ ରଜ ଆସିଛି ଆଜି ।
ଗାଆଁରୁ ସହର ସଭିଏଁ ସଜ,
ପାଳିବେ ବୋଲିକି ପରବ ରଜ ।
ମହକି ଉଠୁଚି ସହର ପଲ୍ଲୀ,
କୁଆଁରୀ ମନ ତ ପଡ଼େ ଉଛୁଳି ।
କୁଙ୍କୁମ କଜଳ ଚନ୍ଦନ ଚିତା,
ପାଦକୁ ସୁନ୍ଦର ସରୁ ଅଳତା ।
ଗଭାରେ ଝୁଲାଇ ଫୁଲ ଗଜରା,
ଜାଇ ଜୁଇ ମଲ୍ଲୀ ବାସରେ ଭରା ।
ନୂଆ ଶାଢ଼ୀ ପିନ୍ଧି ଯେତେ କୁଆଁରୀ,
ସଜାଇ ହୁଅନ୍ତି ଆନନ୍ଦ ଭରି ।
ଗାଆଁ ତୋଟା ମାଳେ ହୋଇଣ ମେଳି,
ଝିଅ ବୋହୂ ମିଶି ଖେଳନ୍ତି ଦୋଳି ।
ଘରେ ଘରେ ଭଳି ଭଳିକା ପିଠା,
ପୋଡ଼ପିଠା ସାଥେ କେତେ ଯେ ମିଠା ।
ମିଠା ପାନ ଭଙ୍ଗା ଆସର ଘରେ,
ଖିଲି ପାନ ଥାଏ ସବୁ ମୁହଁରେ ।
ରଜ ଆଣିଦିଏ ଖୁସି ପସରା,
ଓଡ଼ିଆ ସଂସ୍କୃତି ସେ ପରମ୍ପରା ।
– ମମତା ସାହୁ
Comments
ମମତା ସାହୁ
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
