ଆଲିଙ୍ଗନର ବେଳେବେଳେ ବୟସ ହୋଇଯାଏ
ଶିଥିଳ ହୁଏ ଅଥିର ହୁଏ
କେବେକେବେ ମୃଦୁ କିମ୍ବା ଟାଣ ଚାପରେ ମୋଡ଼ିମକଚି ହୋଇଯାଏ
ହଁ ଆଲିଙ୍ଗନର ବେଳେବେଳେ ବୟସ ହୋଇଯାଏ ।
ଆଲିଙ୍ଗନରେ ତୃପ୍ତି ଅଭିମାନ ନିର୍ଭୟ ଶାନ୍ତି ଲାଗେ
ହେଲେ ତା’ର ନିଶା ହୋଇଗଲେ
ସୁସ୍ଥ ମଣିଷ ବି ରୋଗିଣା ହୋଇଯାଏ
ହଁ ଆଲିଙ୍ଗନର ବେଳେବେଳେ ବୟସ ହୋଇଯାଏ ।
ତା’ର ଉଷ୍ଣ ଓ ଶୁଷ୍କତାରେ ଭାବନା ଜାଣିହୁଏ
କିନ୍ତୁ ତା’ର ବି କ’ଣ ଗୋଟାଏ ମୁଖା ଥାଏ
ନାଇଁ ନାଇଁ ମୁଁ ଝିଅଟାଏ
ମୁଖାର ଆୟତକାର ଭିତରକୁ ପଶିବା ପୂର୍ବରୁ
ମାପିବାକୁ ହେବ ତା’ର ଆୟତନ
ମାପିବାକୁ ହେବ ତା’ର ଉଷ୍ମତାର ରହସ୍ୟ
ଯଦି ସେ ମୋତେ ପ୍ରାପ୍ତ ବୟସ୍କ କହି କୋଳେଇ ଦବ ସତ
ହେଲେ ଜାବୁଡ଼ି ଧରିଲେ ଅଣନିଃଶ୍ୱାସୀ ହୋଇଯିବା ବି ଥୟ ।
– ସୁଚରିତା ପାତ୍ର
Comments
ସୁଚରିତା ପାତ୍ର
ସୁଚରିତା ପାତ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
