ବରଷକେ ଥରେ ରକ୍ଷା ବନ୍ଧନ
ଆଣିଚି ତା’ ସାଥେ କେତେ ଆନନ୍ଦ ॥
ଭଉଣୀ ବାନ୍ଧିବ ଭାଇ ହାତରେ
ରାକ୍ଷୀ ନାମେ ରକ୍ଷା କବଚ ଡୋରେ ॥
ବନ୍ଧନ ଭିତରେ ରକ୍ଷା ବନ୍ଧନ
ଯୋଡ଼ିଦିଏ ଭାଇ ଭଉଣୀ ମନ ॥
ଥିଲେ ଥାଉ ମନେ ଯେ ଅଭିମାନ
ଭଉଣୀ ବନ୍ଧିବ ସ୍ନେହ ବନ୍ଧନ ॥
ଦୁଃଖର ଲୁହରେ ହସରେ ସୁଖି
ରାକ୍ଷୀ ରହିଥାଏ ସର୍ବଦା ସାକ୍ଷୀ ॥
ଭାଇ ଭଉଣୀର ପ୍ରେମ ସମ୍ପର୍କ
ଅନେକ ଫୁଲର ମଧୁ ମହକ ॥
ହେଉ ବର୍ଷା ଶୀତ କାକର ଖରା
ବିପଦେ ଆପଦେ ଭାଇ ସାହାରା ॥
ଭାଇ ଥିଲେ ଜାଣ ଦୁନିଆ ଅଛି
ଭଉଣୀର ଲୁହ ଦିଏ ସେ ପୋଛି ॥
ରେଶମୀ ସୂତାରେ ବନ୍ଧା ସେ ମନ
ଶ୍ଵାଶତ ପ୍ରେମର ପବିତ୍ର ଚିହ୍ନ ॥
ସ୍ୱାର୍ଥ ନାହିଁ ଅଛି ଭାବ ବନ୍ଧନ
ରହିଚି ରହିବ ସେ ଚିରନ୍ତନ ॥
ଭାଇ ଭଉଣୀର ସମ୍ପର୍କ ସୂତା
ଛିଣ୍ଡିବନି କେବେ ସ୍ନେହ ମମତା ॥
– ମମତା ସାହୁ
Comments
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
