ତୁମ ସାଥେ ଦିନେ ଖେଳୁଥିଲି ହୋଲି
ପାଳୁଥିଲି ଦୀପାବଳୀ,
ଫଗୁଣରେ ଦୁହେଁ ଭିଜୁଥିଲେ ଆମେ
ରଙ୍ଗ ହୋଇ ବୋଳାବୋଳି ॥
ଫଗୁ ରଙ୍ଗକୁ ସିନ୍ଥିରେ ମୋ ଭରି
କହୁଥିଲ ତୁମ ବଧୂ,
ମିଛ ବଧୂ ସାଜି ଭାବୁଥିଲି ଦିନେ
ପାଇଗଲି ସୁଖ ସିନ୍ଧୁ ॥
ସତ ମିଛ କିଛି ଦିଶୁତ ନଥିଲା
ତୁମ ପ୍ରେମେ ଅନ୍ଧ ଥିଲି,
ସବୁକଥା ତୁମ ସତ ଲାଗୁଥିଲା
ସତ ବଧୂ ସାଜିଗଲି ॥
ତୁମ ଅଗଣାରେ ଚାଲୁଥିଲି ଦିନେ
ପୂଜୁଥିଲି ମୁଁ ତୁଳସୀ,
ଚଉରା ମୂଳେ ଜାଳି ସଞ୍ଜବତୀ
ସାଜିଲି ତୁମ ଅଳସୀ ॥
ମିଛ ଅଭିମାନେ ରାଗୁଥିଲି ଯେବେ
ଦେଉଥିଲ ଯେ ମନେଇ,
ସ୍ନେହ ବୋଳା ତୁମ ମିଠା କଥା ପଦେ
ନେଉଥିଲା ମନ ମୋହି ॥
ଜହ୍ନ ଆଲୁଅରେ ଘର ଅଗଣାରେ
ବସୁଥିଲେ ପାଖାପାଖି,
ଜହ୍ନ ଜୋଛନାରେ ଭିଜୁଥିଲେ ଦୁହେଁ
ସୁଖ ଦୁଃଖ ପଛେ ରଖି ॥
ସୁନ୍ଦର ବୁଝାମଣା ଆମ ସମ୍ପର୍କ
ଅନ୍ୟରେ ଥିଲା ଅବୁଝା,
ଝଗଡ଼ାର ଦିନେ ନଥିଲାତ ସ୍ଥାନ
ହସି କରୁଥିଲେ ମଜା ॥
ସାତ ଜନମକୁ ଦେଇଥିଲ କଥା
ଗଲ ପୁଣି ତୁମେ ଭୁଲି,
ଗୋଟିଏ ଜନମ ନରହିଲ ସାଥେ
ଅଭାଗିନୀ ସାଜିଗଲି ॥
ଆଜିବି ଏ ଆଖି ତୁମକୁ ଖୋଜୁଛି
ତୁମ ସ୍ମୃତି ସବୁ ଭାଳି,
ତୁମବିନା ଏକା ଜୀବନ କାଟୁଛି
ଯନ୍ତ୍ରଣାରେ ଜଳି ଜଳି ॥
ତୁମବିନା ସିନା ଏକା ମୁଁ ସାଜିଛି
ତୁମ ପରିଚୟେ ଆଜିବି ବଞ୍ଚିଛି
ହଁ ତୁମବିନା…
ମୁଁ ଆଜିବି ବଞ୍ଚିଛି ॥
– ରାଜେଶ୍ୱରୀ ପଣ୍ଡା
Comments
ରାଜେଶ୍ୱରୀ ପଣ୍ଡା ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
