ଜାଗିଉଠ ସର୍ବେ ଉତ୍କଳ ସନ୍ତାନ
ମାତୃଭୂମି ରକ୍ଷା ପାଇଁ,
ପ୍ରତିଟି ମୁହୂର୍ତ୍ତେ ଶପଥ ନିଅ ହେ
ଜାତି ଟେକ ରକ୍ଷା ପାଇଁ ।
ମୋ ଉତ୍କଳ ମାଟି ଅଟେ ସ୍ୱାଭିମାନୀ
ବିଶ୍ୱାସେ ଦିଅଇ ପ୍ରାଣ,
ବୀର ପ୍ରସବିନୀ ମୋ ମାଆ ଧରିତ୍ରୀ
ଅବିଶ୍ୱାସେ ଭାଙ୍ଗେ ଟାଣ ।
ସାହିତ୍ୟ ସଂସ୍କୃତି କଳା ଇତିହାସ
ଅଟେ ଜାତି ପ୍ରାଣ ଧାର,
ଅଟେ ଗୁଣବତୀ ମୋ ଉତ୍କଳ ମାଟି
ବର୍ଣ୍ଣି ନପାରେ ତା’ ଯଶ ଅପାର ।
ମାତୃଭୂମି ମାତୃଭାଷା ନ ଜାଣିଲେ,
ନ ବୋଲିବ କେବେ ଜ୍ଞାନୀ,
ଅକ୍ଷତ ତା ଯଶ କିରତୀ ଗୌରବ
କୋଟି ବୀର ପ୍ରସବିନୀ ।
ଉତ୍କଳ ମାତାର କରୁଣା ପରଶେ
ଦୂର ହୁଏ ଅନ୍ଧକାର,
ସନ୍ତାନ ହୃଦରେ ଜାଗିଉଠିଥାଏ
ଜ୍ଞାନର ଆଲୋକ ଦ୍ୱାର ।
ସୌର୍ଯ୍ୟ ବୀର୍ଯ୍ୟ ତା’ର ଅଖଣ୍ଡ ରହିଛି,
ଜାତିର ସୁରକ୍ଷା ପାଇଁ,
ଏ ସାରା ଜଗତ ବନ୍ଦନା କରୁଛି
ଉତ୍କଳ ସଙ୍ଗୀତ ଗାଇ ।
ଜାଗିଉଠ ସର୍ବେ ଉତ୍କଳ ସନ୍ତାନ,
ବାଜିଲାଣି ଶୁଭ ଧ୍ୱନି,
ପ୍ରତୀକ୍ଷା କଲେଣି ଉତ୍କଳ ମାତା
ଅମୃତ ଆହ୍ୱାନ ଘେନି ।
– ସତ୍ୟବ୍ରତ ମହାପାତ୍ର
Comments
ସତ୍ୟବ୍ରତ ମହାପାତ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
