ତୁମେ ଅନନ୍ତ ଅବିଭକ୍ତ ମନ୍ଦାକିନୀ ସ୍ରୋତ
ତୁମେ ବିଶ୍ୱାସର ବିଦେହୀ ସଂକେତ
ଭୂମି ଠାରୁ ଭୂମା ପର୍ଯ୍ୟନ୍ତ ।
ତୁମେ ଆବୃତ୍ତ ପୁଣି ଅନାବୃତ୍ତ
ତୁମେ ଦାରୁବ୍ରହ୍ମ ସଂକ୍ଷିପ୍ତ ପୁଣି ବିସ୍ତାରିତ ।
ତୁମେ ସୃଷ୍ଟି ପରିବ୍ୟାପ୍ତ ଯୋଜନ ଯୋଜନ
ତୁମେ ସମୟର ସଞ୍ଜୀବନୀ ଉତ୍ଥାନ ପତନ ।
ତୁମେ ବିଶ୍ୱ ରୂପରେ ଉଦ୍ଭାସିତ
ତୁମେ ଅନନ୍ତ ଶୟନରେ ବିରାଜିତ
କୋଟି ବ୍ରହ୍ମାଣ୍ଡର ଆଭା
ପରିତୃପ୍ତ ଅକ୍ଷୟ ଅବ୍ୟକ୍ତ ।
ତୁମ ଓଁ-କାର ଧ୍ଵନିରେ ମୁଁ ବିଗଳିତ
ଗୀତ ଗୋବିନ୍ଦ ପଦ୍ୟର ରାଗିଣୀରେ
ବିସ୍ମିତ ବିମୋହିତ ।
ମୋ ଦୁଃଖର ଗଜରା ମାଳ
ହାତ ବଢ଼େଇ ପିନ୍ଧି ଦିଅ ଏଇ ଥରକ,
ତୁମ ଧୂପ ଦୀପ ନୈବେଦ୍ୟ ମହକରେ
ଲିଭି ଯାଉ ମୋ ମନର ଶୋକ ।
ଏ ଜନ୍ମର ପାଉଣା ଆର ଜନ୍ମକୁ ବାକି ଥାଉ
ଷାଠିଏ ପଉଟି ଭୋଗରୁ
କିଛି ନ ମିଳିଲା ନାହିଁ
କଣିକାଏ ନିର୍ମ୍ୟାଲ୍ୟରେ
ଶୋଷ ମୋର ମେଣ୍ଟି ଯାଉ
ଶୋଷ ମୋର ମେଣ୍ଟି ଯାଉ ।
– ମଞ୍ଜୁରାଣୀ ମିଶ୍ର
Comments
ମଞ୍ଜୁରାଣୀ ମିଶ୍ର
ମଞ୍ଜୁରାଣୀ ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
