ଆଜି ବି ରାସ୍ତାରେ ପିଲାଟେ ବ୍ୟାଗ କାନ୍ଧେଇ ସ୍କୁଲ ଯିବାର ଦେଖିଲେ, କ୍ଷଣିକ ପାଇଁ କାନ୍ଧଟା ଆପେ ଆପେ ଭାରି ହେଇଯାଏ । ଆଖି ଆଗରେ ନାଚି ଉଠେ, ମନ ପସନ୍ଦର କାର୍ଟୁନ୍ ବା ସୁପର୍ ହିରୋଙ୍କ ପ୍ରିଣ୍ଟ ଥିବା ସେ ସ୍କୁଲ ବ୍ୟାଗ୍ ଆଉ ବ୍ୟାଗ୍ ଭିତରେ ସଜାଡ଼ି ହୋଇ ରହିଥିବା ବହି, ଖାତା ଓ ଜ୍ୟାମିତି ବାକ୍ସ । କିନ୍ତୁ ସେମାନଙ୍କ ଗହଳିରେ ଗୋଟାଏ ଖାତା ସହଜରେ ବାରି ହେଇ ପଡ଼େ । ହଁ ସମସ୍ତଙ୍କ ଠୁ ଟିକେ ଭିନ୍ନ ତା’ ବେଶଭୁଷା । ସେ ହେଲା ରଫ୍ ଖାତା ।
ପିଲାଦିନେ ଯିଏ ଯୋଉ ମାଧ୍ୟମ ସ୍କୁଲ କିମ୍ବା ଯେମିତିକା ସ୍କୁଲରେ ପଢୁ, ଆମ ଭିତରୁ ସମସ୍ତେ ଉଣା ଅଧିକେ ରଫ୍ ଖାତା ସହ ପରିଚିତ ଥିବେ । ସ୍କୁଲ ବ୍ୟାଗରେ ସବୁ ଖାତା ବହି ରୁଟିନ୍ ହିସାବରେ ନିଆ ହୁଏ । କିନ୍ତୁ ସୋମବାର ହଉ କି ଶନିବାର, ବ୍ୟାଗରେ ଯଦି କାହାର ସବୁ ଦିନିଆ ହକ୍ ଥାଏ, ତା’ହେଲେ ସେ ହେଲା ରଫ୍ ଖାତା । ଆଉ ଯଦି କେବେ କେମିତି ଦୁର୍ଭାଗ୍ୟକୁ ସେଟା ବ୍ୟାଗରେ ନଥାଏ, କାଇଁ କେଜାଣି ସବୁ ଥାଇ ବି ଅଲଣା ତରକାରୀ ପରି ସେ ଦିନଟା ଫାଙ୍କା ଫାଙ୍କା ଲାଗେ ।
ଅଙ୍କ କଷାଠୁ ଆରମ୍ଭ କରି ରଚନା ଲେଖା, ଛକି ଶୂନଠୁ ଆରମ୍ଭ କରି ରକେଟ ବନା; ସବୁବେଳେ ଦରକାର ହୁଏ ରଫ୍ ଖାତା । ଭାରି ଆପଣାର ଲାଗେ ସେ ଖାତାଟି, ଆଉ ସବୁଠୁ ଅଧିକ ପ୍ରିୟ ବି । ସ୍କୁଲ୍ ବେଳର କେତେ କେତେ ସ୍ମୃତି, ଦୁଷ୍ଟାମୀ ଆଉ ପିଲାଳିଆମୀର ମୂକ ସାକ୍ଷୀ ଥିଲା ରଫ୍ ଖାତା । କିନ୍ତୁ ସବୁ ବହି ଖାତାଙ୍କ ଭିତରେ ସେ ଥିଲା ସବୁଠୁ ଅଧିକ ଅବହେଳିତ । ସବୁଠୁ ଅଧିକ ଖୋଜା ପଡ଼ୁଥିଲେ ବି କେବେ ରଫ୍ ଖାତାକୁ ସାଇତିକି ରଖିବାର ମୋର ମନେ ପଡ଼ୁନି ।
ଅନ୍ୟ ବହି ଖାତାରେ ଚିକି ଚିକିଆ ମଲାଟ ମଡ଼େଇଲାବେଳେ ବି କେବେ ମନେ ପଡ଼େନି ରଫ୍ ଖାତା କଥା । ବୋଧେ ସେ ଖାତା ଉପରେ ଆଉ କାହାର ଦୃଷ୍ଟି ପଡ଼େନି ବୋଲି । ସେଥିରେ କିଛି ଗାରେଇବା ପୂର୍ବରୁ କି କାଗଜ ଚିରିବା ପୂର୍ବରୁ କେବେ ଭାବିବାକୁ ପଡ଼େନି । ସତେ ଯେମିତି ଆମ ସବୁ ଅତ୍ୟାଚାରକୁ ସହିବାକୁ ପଣ କରିଛି ସେ । ହଁ ଯେମିତି ସେ ଖାତା ଉପରେ କେବଳ ଆମରି ହକ୍ ଅଛି, ସମ୍ପୂର୍ଣ୍ଣ ହକ୍ ।
କେବଳ ପାଠ ନୁହଁ, ନିଜ ଲୋକଟେ ପରି ଆମର ସବୁ ବଦମାସିକୁ ବି ଛାତିରେ କୁଣ୍ଢେଇ ଧରୁଥିଲା ରଫ୍ ଖାତା । ସବୁବେଳେ ପାଖରେ ଥାଇ ଅତି ଆପଣାର ସେ । ତେଣୁ ଗାଁ କନିଆଁ ସିଙ୍ଘାଣିନାକୀ ଭଳି ତାକୁ ହତାଦର କରିବା ସ୍ୱାଭାବିକ କଥା । ଅବଶ୍ୟ ସେ ବି କେବେ ପାଟି ଫିଟେଇ ପ୍ରତିବାଦ କରେନି ଟିକେ ଆଦର କି ଯତ୍ନ ପାଇବା ପାଇଁ ।
ଆଜି ବୟସର ଏତେ ପାହାଚ ଅତିକ୍ରମ କଲା ପରେ କେବେ କେମିତି ସାନ ଭଉଣୀଠୁ ରଫ୍ ଖାତା ମାଗି ସେଥିରୁ କାଗଜ ଚିରି ସଉଦା ଚିଠା କଲାବେଳେ ମନେ ପଡ଼ିଯାଏ ମୋ ରଫ୍ ଖାତା କଥା । ଖାଲି ଖାତାଟେ ନୁହଁ, ସେ ବି ଥିଲା ଆମ ପିଲାଦିନର ଗୋଟେ ଅନ୍ତରଙ୍ଗ ବନ୍ଧୁ । ଆମ ସ୍କୁଲ ବେଳର ସବୁ ସ୍ମୃତିକୁ ସାଇତି ରଖିଥିବା ପୋଥିଟେ ।
– ଚିନ୍ମୟ କୁମାର ସାହୁ
Comments
ଚିନ୍ମୟ କୁମାର ସାହୁ
ଚିନ୍ମୟ କୁମାର ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର କବିତା ଆଦି ରଚନା କରନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
