ନୂଆ ବରଷ, ତୁମେ ଆସିଛ
ପାଦ ଥାପି ଥାପି, ନେଇ ନୂଆ ଅଭିଳାଷ,
କଅଁଳ ଖରାରେ, ବୈଶାଖ ସ୍ପର୍ଶରେ
ବିହଙ୍ଗମ କଲରବେ, ଆସିଛ ତୁମେ ନବ ବରଷ ।
ନୂଆ ବରଷର ଆକାଶ ଆଜି
ଲାଗୁଛି ନୂଆ ନୂଆ
ନୂଆ ବରଷର ଏ ମଳୟ ପବନ
ଲାଗେ ଆଜି ନୂଆ ନୂଆ ।
ନୂଆ ବରଷର ନୂତନ ସକାଳେ
ଉଦୟ ହେଲେଣି ରବି
ସ୍ୱାଗତ କରିବାକୁ ତାଙ୍କୁ
ସଜବାଜ ହେଲେଣି ବିହଙ୍ଗମ ରାବି ରାବି ।
ହେ ନବ ବରଷ, ଦେଖ ତୁମ ଆଗମନେ
କେମିତି ମୁଖରିତ ଚତୁର୍ଦ୍ଦିଗ
ଦେଖ ସେ ରକ୍ତଜବା ଗୋଲାପର କଅଁଳ କଢ଼ିଟି
କେମିତି ଫୁଟିବା ସମ୍ଭାବନାରେ ଶୀହରିତ ।
ବିଭୁ ପଦାରବିନ୍ଦରେ ଏତିକି ବିନତି
ଏ ଅଲେଖା ପୃଷ୍ଠାରେ ଦିଅନ୍ତୁ ଭରି
ନୂତନ ବର୍ଷର ନବ କଳେବରରେ
ସ୍ନେହ, ପ୍ରେମ, କରୁଣାର ଧାରା ଯାଉ ବହି ।
ଓଡ଼ିଆ ନବବର୍ଷର ହାର୍ଦ୍ଦିକ ଅଭିନନ୍ଦନ
– ଶର୍ମିଷ୍ଠା ମଲ୍ଲ
Comments
ଶର୍ମିଷ୍ଠା ମଲ୍ଲ
ଶର୍ମିଷ୍ଠା ମଲ୍ଲ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
