ଦୁଇଗୋଟି ରଜ୍ଜୁରେ ବନ୍ଧା ଜୀବନ ଦୋଳି
ସମାହାର ଜନମ ମରଣର,
ପ୍ରଭୁଙ୍କ ଆଦଶେ ବନ୍ଧା ଯେ ହୋଇଛି
ବିଚିତ୍ରତା ପୂର୍ଣ୍ଣ ଏହା ସୃଷ୍ଟିର ।
ଜୀବନ ଦୋଳିର ଦୁଇପାର୍ଶ୍ଵ ସଜ୍ଜିତ ହୋଇଛି
କେବେ ସୁଖ ଏଠି କେବେ ଦୁଃଖ,
ସଂସାର ବାରିଧି ପୂର୍ଣ୍ଣ ହୋଇ ଯେ ଚାଲିଛି
ନିନ୍ଦା ପ୍ରଶଂସା ଯେ ଏହାର ଆଭିମୁଖ୍ୟ ।
ଶୈଶବ ଯୌବନ ବାର୍ଦ୍ଧକ୍ୟ ପାବଚେ
ଚଢ଼ି ପହଞ୍ଚେ ମନୁଷ୍ୟ ଶୀର୍ଷରେ,
ମାନ ଅପମାନ କେବେ ସମ୍ପତ୍ତି ବିପତ୍ତି
ସାଥୀ ହୋଇ ରହିଥାନ୍ତି ଆମ ଜୀବନରେ ।
ମୁଢ଼ ମନୁଷ୍ୟ ପୂର୍ଣ୍ଣ କବଳିତ ଏଠି
ଲୋଭ ହିଂସା ମାୟା ଜାଲରେ,
ଦୁର୍ଲଭ ଜୀବନ କରି ଅପଯୋଗ
ପଶ୍ଚାତାପ କରିବସେ ପଶ୍ଚାତରେ ।
କେବେ ଶୁଭେ ଏଠି ସୁଖର ଉଲ୍ଲାସ
କେବେ ଶୁଭେ ଭୈରବର ଆର୍ତ୍ତନାଦ,
ଏନ୍ତୁଡ଼ିରୁ ଆରମ୍ଭ ହୋଇ ଜୁଇରେ ଶେଷ
ଏହି ତ ଜୀବନ ଦୋଳିର ନିନାଦ ।
– ରଶ୍ମୀବାଳା ଶତପଥୀ
Comments
ରଶ୍ମୀ ବାଳା ଶତପଥୀ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ, କବିତ ଆଦି ରଚନା କରିଥାନ୍ତି । ତାଙ୍କ ରଚିତ ଅନେକ ଗୁଡ଼ିଏ ଗପ, କବିତା ବିଭିନ୍ନ ପତ୍ରପତ୍ରିକାରେ ପ୍ରକାଶ ପାଇଛି ।
