ଗୁରୁ ବ୍ରହ୍ମା ବିଷ୍ଣୁ ଗୁରୁ ମହେଶ୍ଵର
ଗୁରୁ ଜ୍ଞାନର ଭଣ୍ଡାର
ଗୁରୁ ପିତା ମାତା ଗୁରୁ ଯେ ଦେବତା
ଗୁରୁ ସତ୍ୟ ଶିବ ସୁନ୍ଦର ॥
ଗୁରୁ ଯେ ସଂସ୍କାର ବିଶ୍ଵାସର ଧାର
ଗୁରୁ ଆଲୋକ ପ୍ରଦୀପ
ଅଜ୍ଞାନ ଅନ୍ଧାର କରି ଦ୍ୟନ୍ତି ଦୂର
ଜାଳନ୍ତି ଉଜ୍ୱଳ ଦୀପ ॥
ଗୁରୁ ସମସ୍ୟାର ସମାଧାନ ସୂତ୍ର
ଗୁରୁ ହିଁ ଆଶା ଭରସା
ଗୁରୁଙ୍କ ଶ୍ରେଣୀରେ ସମସ୍ତେ ସମାନ
କରନ୍ତିନି କେବେ ନିରାଶା ॥
ଶିକ୍ଷାର୍ଥୀଙ୍କ ପାଇଁ ଶୁଭ ଚିନ୍ତକଟି
କରନ୍ତି ଚରିତ୍ର ଗଠନ
ନାହିଁ ଭେଦଭାବ ନାହିଁ ଅନାଦର
ନାହିଁ ପକ୍ଷପାତ ଚିହ୍ନ ॥
ଗୁରୁ ହିଁ ଶକତି ଗୁରୁ ହିଁ ସାହସ
ଗୁରୁ ହିଁ ମୁକତି ପଥ
ଜ୍ଞାନ ପ୍ରାପ୍ତ କରି ଅଜ୍ଞାନ ଦୂରେଇ
ଦିଅନ୍ତି ନରଖି କିଞ୍ଚିତ ॥
ଧନ୍ୟ ହୁଏ ପ୍ରାଣ ଆନନ୍ଦିତ ମନ
ପାଇ ଗୁରୁ ଦିବ୍ୟ ଦର୍ଶନ
ଗୁରୁ ଆଶୀର୍ବାଦ ରହିଲେ ଜୀବନେ
ନଥାଏ ଯେ ବାଧା ବିଘ୍ନ ॥
ଗୁରୁ ଜୀବନର ମୂଳ ଦୂଆ ଜାଣ
ତାଙ୍କ ପାଦେ କୋଟି ପ୍ରଣାମ
ଗୁରୁ ବିନା ସ୍ଥିତି ନାହିଁ କାହା ପ୍ରାଣେ
ଗୁରୁ ଯେ ସର୍ବ ପ୍ରଥମ ॥
ଗୁରୁ ହିଁ ଧରମ ଗୁରୁ ହିଁ କରମ
ନର ରୂପେ ନାରାୟଣ
ଗୁରୁଙ୍କର ସେବା ଆନନ୍ଦେ କରିବା
ଦେଇ ତାଙ୍କ ପାଦେ ମନ ॥
– ମମତା ସାହୁ
Comments
ମମତା ସାହୁ ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
