ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
ତୁ ଦୟା ସାଗର
ତୁ ଭାବ ମନ୍ଦିର ।
କୃପା କର ଆହେ
ହେ କରୁଣାକର ॥
ନୀଳାଚଳ ଧାମେ ବିରାଜି ମହନ୍ତ ।
ଜଗତର ଦାତା କାଳିଆ ସାଆନ୍ତ ॥
ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
ତୁ ପୁଣ୍ୟ ସମୀର
ଜଗତର ବୀର ।
ପରମ ଉଦାର
କାଳିଆ ଠାକୁର ॥
ଶରଣବତ୍ସଳ ହେ ରଙ୍କରତନ ।
ଜଗତବାସୀର ତୁ ମନମୋହନ ॥
ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
ସତ୍ୟରେ ନୃସିଂହ
ତୁ ପୁନଃ ବାମନ ।
ସାଜି ପ୍ରାଣାତ୍ରାତା
ହରୁ ଦର୍ପମାନ ॥
ସାକାର ରୂପେ ତୁ ନିରାକାର ବ୍ରହ୍ମ ।
ସଜୀବ ଶାଶ୍ଵତ ଚିରନ୍ତନ ବ୍ରହ୍ମ ॥
ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
ତ୍ରେତୟାରେ ରାମ
ତୁ ପୁରୁଷୋତ୍ତମ ।
ପିତୃସତ୍ୟ ପାଳି
ରଖିଲୁ ବଚନ ॥
ଭକତବତ୍ସଳ ହେ ପାପହାରକ ।
ସୃଷ୍ଟିପାଳକ ତୁ ହେ ଭବତାରକ ॥
ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
ଦ୍ଵାପରରେ କୃଷ୍ଣ
ରାଧାର ତୁ ଶ୍ୟାମ
ହେ ମଦନ ଷୋଳ
କଳାର ତୁ ଧାମ ॥
ତୁ ନାମ କୀର୍ତ୍ତନ, ବନ୍ଦନ, ସ୍ମରଣ
ମୁକ୍ତିମିଳେ କଲେ ତୋ’ ଭକ୍ତି ଶ୍ରବଣ ।
ଜଗତର ନାଥ ଆହେ ଜଗନ୍ନାଥ
ଭକତ ଜନର ତୁହି ପ୍ରାଣନାଥ ॥
କଳିରେ କଳକୀ
ହେ ପରମବ୍ରହ୍ମ ।
ଅଧର୍ମକୁ ନାଶି
କଲୁ ସତ୍ୟକର୍ମ ॥
ଦୟାର ସାଗର, କ୍ଷମାର ମନ୍ଦିର ।
ସକଳ ଶକ୍ତିର ତୁ ପୁଣ୍ୟ ଭଣ୍ଡାର ॥
ଜଗତର ନାଥ ଆହେ ଜଗନ୍ନାଥ ।
ଭକତ ଜନର ତୁହି ପ୍ରାଣନାଥ ॥
– ଜୟନ୍ତୀ ପଣ୍ଡା
Comments
ଜୟନ୍ତୀ ପଣ୍ଡା ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
