ସୁଖ ଆଉ ଦୁଃଖକୁ ମିଶାଇ ଦେଖିଲି
ମୋତେ ଏକାପରି ଲାଗିଲା
ହସ ଭିତରେ କାନ୍ଦ, କାନ୍ଦ ଭିତରେ ହସକୁ
ଖୋଜିବାପାଇଁ ଚେଷ୍ଟାକଲି
ଶେଷରେ ମିଳିଗଲା ।
ମୁଁ ଜାଣିବାକୁ ସେଇଦିନ ପାଇଲି
ଯୋଉଦିନ ଅସଂଖ୍ୟ ଲୁହର ବୁନ୍ଦା ଭିତରେ
ମୋ ଅସୀମିତ ଖୁସି ଲୁଚି ରହିଥିଲା
ଆଉ ଅପରିର୍ଯ୍ୟାପ୍ତ କ୍ଷଣିକ ହସ ଭିତରେ
ସ୍ଥାୟିତ୍ୱ ବାନ୍ଧି ଦେଇଥିଲା ଲୁହର ମୂଳଦୁଆ ।
ଠିକ ସେହିଭଳି ଏ ଜଗତ ଆଉ ଜୀବନ
କେବେ ମୁଁ ଏ ଜଗତ ଭିତରେ ଜୀବନକୁ
କେବେ ପୁଣି ଜୀବନ ଭିତରେ ଜଗତକୁ ଦେଖେ
ଭଲ ମନ୍ଦ ଦୁଇଟି ଶବ୍ଦ ହେଲେବି
ଗୋଟିଏ ସରଳରେଖାର ଦୁଇଟି ବିନ୍ଦୁ
ପାପ ଆଉ ପୁଣ୍ୟ ଭିତରେ ମୁଁ କିଛି
ପାର୍ଥକ୍ୟ ଦେଖିପାରେ ନାହିଁ ।
ଠିକ ସେମିତି ଧର୍ମ ଅଧର୍ମ ଭିତରେ
ନୀତି ଅନୀତି ଆଉ ସେମିତି
ମଣିଷ ମଣିଷ ଭିତରେ
ଏ ସବୁ କଥା ଖୋଲି ନକହିଲେ ବି
ଉପରକୁ ଦେଖା ଯାଉନଥିଲେ ବି
ସ୍ପଷ୍ଟ ଭାବରେ ପଢ଼ି ହେଉନଥିଲେ ବି
ଠିକଭାବେ ଜାଣି ହୁଏ ଆଉ
ଜାଣିବା ଲୋକଙ୍କ ସଂଖ୍ୟା ବି କିଛି କମ ନୁହେଁ ॥
– ଗଣେଶ୍ୱର ମହାନ୍ତି
Comments
ଗଣେଶ୍ୱର ମହାନ୍ତି ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
