ମୋ ମନ ଶୂନ୍ୟତାର କିଆରୀରେ
ବାରମ୍ବାର ପ୍ରତିଧ୍ୱନିତ ହୁଏ
ସେଇ ଗୋଟିଏ ପ୍ରଶ୍ନ
ଆଜିଯାଏଁ ମୁଁ ଜୀବନରେ କରିଛି କ’ଣ??
ଅତୀତକୁ ବଖାଣି ବସିଲେ
ଦୁଷ୍ଟ ସ୍ମୃତିମାନ ସବୁ
ନିଜ ନିଜର ଜାଗା ମାଡ଼ି ବସନ୍ତି
ହୃଦୟର କେଉଁ ଏକ ମରୁଭୂମିରେ ॥
ମୁଁ ଜୀବନ ସଂଗ୍ରାମରେ ହାରିଯାଇ
ଆଜି ପଥହରା ପାଲଟିଛି
ଆଉ ମରୀଚିକା ପଛେ ଧାଇଁ ଧାଇଁ
ପାଲଟିଛି କ୍ଲାନ୍ତ ଆଉ ସ୍ଲାନ୍ତ ॥
ମରିଯାଇଛି ମୋ ଜୀବନର
ଯେତେ ସବୁ କାମନା ଓ ବାସନା
ଝରା ସେଫାଳି ଆଜି ପାଲଟିଛି
ଯେତେସବୁ ଆଶା ଓ ଆକାଂକ୍ଷା ॥
ପଥ ଆଜି ମୋର ମଳିନ, ଶୁଷ୍କ
ନିସ୍ତବ୍ଧ ଆଉ ଅନ୍ଧକାର
ମୁଁ କେବଳ ଅଭିନୟ କରୁଛି
ଆଉ କରିଚାଲିଥିବି
ଜୀବନର ଶେଷ ଅଙ୍କ ଯାଏ ॥
– ଶୁଭଶ୍ରୀ ମିଶ୍ର
Comments
ଶୁଭଶ୍ରୀ ମିଶ୍ର ଓଡ଼ିଆ ଭାଷାରେ ବିଭିନ୍ନ ପ୍ରକାରର ଗପ ଓ କବିତା ଆଦି ରଚନା କରନ୍ତି । ତାଙ୍କ ରଚିତ ଗପ ଓ କବିତାଗୁଡ଼ିକ ବିଭିନ୍ନ ପତ୍ରପତ୍ରିକାରେ ସ୍ଥାନ ପାଇ ପାଠକୀୟ ଆଦୃତି ଲାଭ କରିଛି ।
