ଏମିତି ହୁଅନ୍ତାନି
ସରନ୍ତାନି କେବେ ଧୂଳିଖେଳ
ଷଡ଼େଇରେ ଭାତ ଡାଲି ରାନ୍ଧିବାର ବେଳ
ସାରୁପତ୍ର ଥାଳିରେ ଷଡ଼େଇ ଗିନାରେ
ପରସୁଥାନ୍ତୁ ତୁ ପାଖରେ ବସି
ମିଛି ମିଛିକା କୁନି ବୋହୁଟିଏ ସାଜି ।
ଫେରି ଆସନ୍ତାନି ।
ସେଇ ଅଫେରା ଦିନ
ରାଗ-ରୁଷା-ଅଭିମାନ
ମୁହଁ ଫୁଲାଫୁଲି
ଲୁଚକାଳି ଆଉ ବୋହୂଚୋରି ଖେଳ
କୁନିକୁନି କଅଁଳିଆ ପାପୁଲିରେ
ଆଖିବୁଜି ଧରିବାର ବେଳ ।
ଏମିନ୍ତି ହୁଅନ୍ତାନି ।
ସମୟଟା ରହିଯାନ୍ତା ଥମକରି
ତୋ’ ମୋ ଖେଳ ସେଇମିତି ଚାଲିଥାନ୍ତା
ଗତାନୁଗତିକ ରୀତିରେ
ଦିନରାତି ଆସିବା ପରେ
ପୃଥିବୀର ଆୟୁଷ ସରିବା ପର୍ଯ୍ୟନ୍ତ ।
ଏମିତି ହୁଅନ୍ତାନି ।
ଦୁନିଆର ପାପ-ରାକ୍ଷସର ଆଖି
ପଡ଼ନ୍ତାନି ଆମ ଉପରେ
ସେଇମିତି ନିଷ୍ପାପ ମନ ନେଇ
ଜୀବନର ମଧୁର ସଙ୍ଗୀତ ଗାଇ
ଶୋଇଯା’ନ୍ତେ ସାଥୀ ହୋଇ
ଅଭଙ୍ଗା ନିଦରେ ।
– ଅଭିମନ୍ୟୁ ପାଢ଼ୀ
କୁମ୍ଭାରିଆ, ବନ୍ତ, ଭଦ୍ରକ
Comments
ଭଦ୍ରକ ଜିଲ୍ଲାର ବନ୍ତ ବ୍ଲକ୍ ଅନ୍ତର୍ଗତ କୁମ୍ଭାରିଆ ଗ୍ରାମର ଅଧିବାସୀ ଶ୍ରୀଯୁକ୍ତ ଅଭିମନ୍ୟୁ ପାଢ଼ୀ ଓଡ଼ିଆ ଭାଷାରେ ବିଭନ୍ନ ପ୍ରକାରର କବିତା ରଚନା କରିଥାନ୍ତି ।
